18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
ՌԴ-ն հարձակվել է Խերսոնում մարդասիրական օգնություն տեղափոխող ՄԱԿ-ի բեռնատարների վրա․ սա կարող է պատերազմական հանցագործություն համարվել
Քաղաքականություն
14.10.2025 | 18:34
Խերսոնի մարզում Ռուսաստանի կողմից հարձակման է ենթարկվել մարդասիրական օգնություն տեղափոխող չորս բեռնատարներից բաղկացած շարասյունը։ Բեռնատարները, ըստ Ուկրաինայում ՄԱԿ-ի մարդասիրական հարցերով համակարգող Մաթիաս Շմալեի հայտարարության, հստակ նշված էին որպես ՄԱԿ-ին պատկանող, գրում է BBC-ի ռուսական ծառայությունը։
«Նման հարձակումները բացարձակապես անընդունելի են: Մարդասիրական աշխատողները պաշտպանված են միջազգային մարդասիրական իրավունքով և երբեք չպետք է հարձակման ենթարկվեն։ Մարդասիրական աշխատողների և մարդասիրական հաստատությունների վրա միտումնավոր հարձակումը միջազգային մարդասիրական իրավունքի կոպիտ խախտում է և կարող է համարվել ռազմական հանցագործություն»,- ասել է Շմալեն։
Հայտարարության մեջ նշվում է, որ բեռնատարներն ուղևորվում էին Բելոզերկա քաղաք, որը մի քանի ամիս մարդասիրական օգնություն չէր ստացել։
Հաղորդվում է նաև, որ երբ մարդասիրական օգնության աշխատակիցները (ներառյալ՝ Առողջապահության համաշխարհային կազմակերպության ուկրաինական գրասենյակների և ՄԱԿ-ի մարդասիրական գործերի համակարգման գրասենյակի աշխատակիցները) ժամանել են դեպքի վայր, ինտենսիվ հրետանային կրակոցներ են սկսվել: Այնուհետև, երբ սկսել են բեռնաթափման աշխատանքները, երկու բեռնատարներ հարձակման են ենթարկվել FPV անօդաչու թռչող սարքերով: Շմալեի խոսքով՝ այդ բեռնատարները հստակ նշված էին որպես Համաշխարհային պարենային ծրագրի մեքենաներ:
Վնասվել է երկու բեռնատար: Հարձակման հետևանքով ոչ ոք չի տուժել:
Ավելի վաղ Խերսոնի տարածաշրջանային ռազմական վարչակազմի ղեկավար Ալեքսանդր Պրոկուդինն էր հայտնել մարդասիրական շարասյան վրա հարձակման մասին:
Ռուսաստանի իշխանությունները դեռևս չեն մեկնաբանել այս հաղորդագրությունները:
Թարգմանությունը՝ Էմմա Չոբանյանի
