05.12.2025 | 20:35
«Պայուսակում թմրանյութ են գցել, նկարն ուղարկել Viber-ով»․ մանրամասներ՝ արքեպիսկոպոսի շուրջ սկանդալից. ՏԵՍԱՆՅՈՒԹ
«Երևանի քաղաքային նոր աղբավայր» ընկերության տնօրենի պարտականությունների կատարումը վերապահվել է Վահան Առուշանյանին
Հասարակություն
14.10.2025 | 18:09
Դեռևս հոկտեմբերի 10-ին Factor.am-ի հետ զրույցում Երևանի քաղաքապետարանից հայտնել էին, որ «Երևանի քաղաքային նոր աղբավայր» ընկերության տնօրենի պաշտոնակատար Վահե Վարդապետյանն ազատվել է աշխատանքից։ Այժմ քաղաքապետարանի պաշտոնական կայքէջում հրապարակվել է որոշումը, որը քաղաքապետ Տիգրան Ավինյանի կողմից ստորագրվել է հոկտեմբերի 13-ին։
«Վահե Վարդապետյանին 2025 թվականի հոկտեմբերի 13-ից ազատել «Երևանի քաղաքային նոր աղբավայր» փակ բաժնետիրական ընկերության տնօրենի պաշտոնից, աշխատանքային վերջին օր համարել 2025 թվականի հոկտեմբերի 10-ը»,- նշվում է որոշման մեջ։
Նույն որոշամբ՝ «Երևանի քաղաքային նոր աղբավայր» ՓԲԸ-ի տնօրենի պարտականությունների կատարումը ժամանակավորապես վերապահել է նույն ընկերության տնօրենի տեղակալ Վահան Առուշանյանին։ Վարդապետյանն այս պաշտոնում նշանակվել էր 2024-ի փետրվարին։
Ավելի վաղ Ավինյանը հայտարարել էր` բռնկված հրդեհը պատահական չէր, այլ դիտավորություն:
«Արդեն խոսել եմ ԱԱԾ տնօրենի և ՆԳ նախարարի հետ: Հրդեհի հետ որևէ կապ ունեցած անձ կենթարկվի պատասխանատվության օրենքի ամբողջ խստությամբ: Ես երաշխավորում եմ՝ այս դեպքը չի կարող մնալ անպատասխան: Միաժամանակ խստացվել են աղբավայրի տարածք մուտքի և ելքի ռեժիմները»,- նշել է նա։
Ավելի ուշ հայտնի էր դարձել, որ դեպքի վերաբերյալ քրեական վարույթ է նախաձեռնվել։
