10.03.2026 | 23:51
Միրզոյանը և ԱՄՆ պետքարտուղարի տեղակալը քննարկել են ՀՀ-ԱՄՆ ռազմավարական գործընկերության խորացման հարցեր
Ադրբեջանի և ՌԴ-ի փոխվարչապետներն Իրանում դիտարկել են Հյուսիս-Հարավ միջանցքի ենթակառուցվածքները
Քաղաքականություն
14.10.2025 | 20:14
Ադրբեջանի փոխվարչապետ Շահին Մուստաֆաևի, Ռուսաստանի փոխվարչապետ Ալեքսեյ Օվերչուկի ու Իրանի ճանապարհների և քաղաքաշինության նախարար Ֆարզանե Սադեղի գլխավորած պատվիրակություններն Իրանի Աստարա քաղաքում դիտարկել են Հյուսիս-Հարավ միջազգային տրանսպորտային միջանցքի կարևոր ենթակառուցվածքային օբյեկտները։ Ադրբեջանական լրատվամիջոցների հաղորդմամբ՝ պատվիրակություններն այցելել են Ադրբեջան-Իրան սահմանին գտնվող Աստարա գետի վրայով անցնող ավտոմոբիլային կամուրջը, որը բացվել է 2023 թվականի դեկտեմբերին։
Կամուրջն ունի օրական 500 մուտք և 500 ելք յուրաքանչյուր ուղղությամբ, ընդհանուր առմամբ՝ 1000 բեռնատար մեքենա։
Այնուհետև նրանք ստուգել են Իրանի Աստարա քաղաքում գտնվող և «Ադրբեջանի երկաթուղիներ» ընկերությանը պատկանող Հարավային բեռնատար տերմինալի շինարարության ընթացքը։ Տերմինալի տարեկան բեռնափոխադրման հզորությունը ներկայում կազմում է 1 միլիոն տոննա, նախատեսվում է այն հասցնել մինչև 5 միլիոն տոննայի։ Շինարարության ավարտը նախատեսված է տարեվերջին։ Պատվիրակությունները նաև դիտարկել են Իրանի տարածքում Ռեշտ-Աստարա երկաթուղու շինարարությունը։
Ադրբեջանական լրատվամիջոցների հետ զրույցում Իրանի ճանապարհների և քաղաքաշինության նախարար Ֆարզանե Սադեղը խոսել է Արաքսի միջանցքի աշխատանքների մասին։
«Աղբենդ-Կալալա կամուրջը կառուցվում է Ադրբեջանի կողմից։ Կամրջի կառուցման տարածքում ափամերձ կայունացման աշխատանքները նախատեսվում է ավարտել այս տարվա վերջին։ Այս կամրջի տարածքում տերմինալի շինարարությունը նույնպես նախատեսվում է ավարտել հաջորդ տարի՝ Նովրուզի տոնից առաջ։ Սա նշանակում է, որ այս ենթակառուցվածքը կլինի օգտագործելի։ Այժմ աշխատանքներ են ընթանում Աղբենդ-Կալալա կամրջի վրա՝ Իրանից Ջուլֆա տանող ճանապարհը լայնացնելու համար։ Այս ճանապարհը կներառի բազմաթիվ կամուրջներ և թունելներ։ Այժմ ընթանում է թունելների կառուցումը, այն նախատեսվում է ավարտել առաջիկա 1-2 տարիների ընթացքում։ Կամրջի և տերմինալի կառուցումը կնպաստի տարածաշրջանի և մեր երկրների զարգացմանը»,- հայտարարել է նա։
Հիշեցնենք, որ նախօրեին Բաքվում տեղի էր ունեցել Ադրբեջանի, Ռուսաստանի և Իրանի կառավարությունների ներկայացուցիչների եռակողմ հանդիպումը։
Թարգմանությունը՝ Էմմա Չոբանյանի
