01.04.2026 | 14:33
Մեկնարկել է ապրիլ ամսվա կենսաթոշակների և նպաստների վճարման գործընթացը՝ արդեն իսկ բարձրացված չափերով․ ԱՍՀՆ
ԵՄ-ն 10 մլն եվրո կհատկացնի հատուկ տրիբունալին՝ Ուկրաինայի դեմ ՌԴ-ի հանցագործությունները հետաքննելու համար
Քաղաքականություն
14.10.2025 | 15:18
Կիև կատարած այցի ժամանակ ԵՄ դիվանագիտության ղեկավար Կայա Կալլասը հայտնել է, որ ԵՄ-ն առաջին 10 միլիոն եվրոն է հատկացնում հատուկ տրիբունալին՝ Ուկրաինայի դեմ ագրեսիայի հանցագործությունները հետաքննելու համար, գրում է Current time-ը։
«Մենք առաջին 10 միլիոն եվրոն ենք հատկացնում հատուկ տրիբունալին՝ երաշխավորելու համար, որ ագրեսիայի հանցագործությունների համար պատասխանատուները չխուսափեն արդարադատությունից»,- ասել է Կալլասը X-ում գրառման մեջ։
Նրա խոսքով՝ «Ռուսաստանի կողմից Ուկրաինայում ռազմական հանցագործությունների ապացույցներն ակնհայտ են»։
Հավելենք, որ հատուկ տրիբունալի ստեղծման մասին համաձայնագիրը ստորագրվել է Ստրասբուրգում 2025 թվականի հունիսի 25-ին՝ Ուկրաինայի նախագահ Վլադիմիր Զելենսկիի և Եվրոպայի խորհրդի գլխավոր քարտուղար Ալեն Բերսեի կողմից: Փաստաթուղթն Ուկրաինայի Գերագույն ռադայի կողմից վավերացվել է հուլիսի 15-ին։
Հատուկ տրիբունալը կգործի Եվրոպայի խորհրդի շրջանակում և կունենա մանդատ՝ ագրեսոր պետության բարձրագույն ղեկավարությանը հետապնդելու Ուկրաինայի դեմ ագրեսիայի հանցագործության համար։ Զելենսկին ասել է, որ դատարանը հնարավորություն է տալիս պատասխանատվության ենթարկել ագրեսիայի հանցագործության համար պատասխանատուներին։
«Այլ հաստատությունները, նույնիսկ միջազգայինները, չունեն դրա համար անհրաժեշտ գործիքներ, և մենք պետք է հստակ ցույց տանք, որ ագրեսիան հանգեցնում է պատժի»,- ասել էր նա։
2024 թվականի մարտին Հաագայի Միջազգային քրեական դատարանը (ՄՔԴ) ՌԴ նախագահ Վլադիմիր Պուտինի և երեխաների իրավունքների պաշտպան Մարիա Լվովա-Բելովայի կալանքի օրդեր էր տվել՝ Ուկրաինայի օկուպացված տարածքներից Ռուսաստան երեխաների անօրինական արտաքսման համար։
Թարգմանությունը՝ Էմմա Չոբանյանի
