Վենեսուելան փակել է Նորվեգիայում դեսպանատունը՝ վենեսուելացի ընդդիմության առաջնորդին Խաղաղության Նոբելյան մրցանակ շնորհելուց հետո

Վենեսուելան հայտարարել է Նորվեգիայում իր դեսպանատան փակման մասին՝ առանց բացատրության։ Սա տեղի է ունենում  մի քանի օր անց այն բանից հետո, երբ Նորվեգիայի Նոբելյան կոմիտեն խաղաղության Նոբելյան մրցանակը շնորհել էր երկրի ընդդիմության առաջնորդ Մարիա Կորինա Մաչադոյին։ Կիրակի Վենեսուելայի նախագահ Նիկոլաս Մադուրոն նրան անվանել էր «կախարդ», գրում է The Insider-ը։

Նորվեգիայում դեսպանատնից բացի՝ Կարակասը նաև հայտարարել է Ավստրալիայում իր առաքելության աշխատանքի  դադարեցման մասին։ AFP-ի փոխանցմամբ՝ Նորվեգիայում դեսպանատան հեռախոսներն անջատված էին դեռևս երկուշաբթի օրվանից։ Փոխարենը, նոր դեսպանատներ կբացվեն Զիմբաբվեում և Բուրկինա Ֆասոյում։

Նորվեգիայում երկրի դեսպանատունը սոցիալական ցանցերում հայտարարություն է տարածել՝ նշելով, թե կառավարությունն այս քայլը ձեռնարկել է «իր դիվանագիտական ​​ծառայությունը վերակառուցելու և ռեսուրսները ռազմավարական կերպով  վերաբաշխելու համար՝ ազգային առաջնահերթությունները գնահատելուց հետո»։

Դեսպանատների փակման լուրը հայտնի է դարձել Խաղաղության Նոբելյան մրցանակը վենեսուելացի քաղաքական գործիչ Մարիա Կորինա Մաչադոյին շնորհվելուց երեք օր անց։ Կիրակի Մադուրոն, ելույթ ունենալով Վենեսուելայի բնիկ ժողովուրդների դիմադրության օրվան նվիրված միջոցառման ժամանակ, Մաչադոյին անվանել էր  «կախարդ», որին «մերժում է բնակչության 90%-ը»։ Ըստ AFP-ի՝ Մադուրոն միայն անուղղակիորեն է նշել, որ նկատի ունի Նոբելյան մրցանակակրին՝ առանց նրա անունը նշելու։ Վենեսուելայի իշխանությունները նրան հաճախ անվանում են la sayona՝ հղում անելով լատինաամերիկյան ֆոլկլորում վրեժխնդիր կանացի ոգուն։

Մարիա Կորինա Մաչադոն Վենեսուելայի ընդդիմության առաջնորդներից է: 2023 թվականին նա ամենաշատ ձայներն է ստացել ընդդիմության նախնական ընտրություններում, սակայն դատարանը, ի վերջո, նրան զրկել է նախագահի պաշտոնում առաջադրվելու հնարավորությունից։

Մաչադոն Վենեսուելայի առաջնորդ Նիկոլաս Մադուրոյի քաղաքականության խիստ քննադատն է: Time ամսագիրը նրան անվանել է Վենեսուելայի «Երկաթե լեդի»:

Թարգմանությունը՝ Էմմա Չոբանյանի