Պակիստանի և Աֆղանստանի հակամարտության արդյունքում տասնյակ մարդիկ են զոհվել

Աֆղանստանի և Պակիստանի միջև լարվածությունը սրվել է, հայտնում է AFP գործակալությունը՝ հղում անելով երկու կողմերի հայտարարություններին։ Երկու երկրներն էլ տեղեկացնում են, որ սահմանային բախումների հետևանքով կան տասնյակ զոհեր։ Անկախ աղբյուրներով այս տվյալները դեռ հնարավոր չէ ստուգել։

Քաբուլում իշխանություն ունեցող իսլամիստական «Թալիբան» շարժման ներկայացուցիչ Զաբիհուլլա Մուջահիդը հայտարարել է, որ բախումների հետևանքով սպանվել է 58 պակիստանցի զինվոր։ Իսլամաբադը այս տվյալները պաշտոնապես չի հաստատել։ Թալիբների տեղեկություններով՝ Պակիստանի 20 սահմանային անցակետեր ժամանակավորապես անցել են իրենց վերահսկողության տակ։ Աֆղանստանը այս գործողությունները որակել է որպես «վրեժխնդրության գործողություններ»։ Մուջահիդի խոսքով՝ բախումների ընթացքում զոհվել է նաև ինն աֆղանցի զինվորական։

Պակիստանական լրատվամիջոցները, հղում անելով ուժային կառույցների աղբյուրներին, հայտնել են, որ աֆղանական կողմն էլ ունի բազմաթիվ զոհեր, իսկ պակիստանցի զինվորականները վերահսկողության տակ են վերցրել 19 աֆղանական սահմանային անցակետ, գրում է AFP-ն։

Պակիստանցի աղբյուրների տվյալներով՝ հոկտեմբերի 11-ի երեկոյան աֆղանական ուժերը կրակ են բացել մի շարք հատվածներում՝ երկկողմ սահմանի երկայնքով։ Դրանք ներառել են Չիտրալ քաղաքը, Բահրամչա քաղաքը՝ Աֆղանստանի Բելուջիստան նահանգում։ dpa գործակալության հաղորդմամբ՝ Պակիստանը պատասխանել է ծանր հրետանիով, տանկերով, անօդաչուներով, ինչպես նաև օդ է բարձրացրել կործանիչներ։