29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Ճապոնիայի ընդդիմությունը կարող է միավորվել իշխանությունը զավթելու համար. Nikkei
Քաղաքականություն
11.10.2025 | 13:33
Ճապոնիայի ընդդիմադիր կուսակցություններն ուսումնասիրում են վարչապետի մեկ թեկնածուի շուրջ համախմբվելու հնարավորությունը, որպեսզի խորհրդարանական ընտրություններում շրջանցեն իշխող Լիբերալ-դեմոկրատական կուսակցության (ԼԴԿ) առաջնորդին և զավթեն իշխանությունը ԼԴԿ-Կոմեյտո կոալիցիայի փլուզումից հետո, հաղորդում է Nikkei-ը։
Ընդդիմության գլխավոր կուսակցության՝ Սահմանադրական դեմոկրատական կուսակցության (ՍԴԿ) առաջնորդ Յոշիհիկո Նոդան ստեղծված իրավիճակն անվանել է «տասնամյակում մեկ անգամ պատահող հնարավորություն կառավարությունը փոխելու համար»։ Նա մտադիր է կոչ անել ընդդիմությանը միավորվել մեկ թեկնածուի շուրջ՝ խորհրդարանական ընտրություններում մեծամասնություն ապահովելու համար։ Նշվում է, որ Նոդան կարող է աջակցել Ժողովրդա-դեմոկրատական կուսակցության (ԺԴԿ) առաջնորդ Յուիչիրո Տամակիի թեկնածությունը։
Այնուամենայնիվ, ԺԴԿ-ն զգուշավոր է ՍԴԿ-ի հետ համագործակցելու գաղափարի հարցում, քանի որ կուսակցությունների տեսակետները՝ միջուկային էներգիայի և պաշտպանական քաղաքականության հետ կապված հարցերի շուրջ, տարբեր են։ Ինքը՝ Տամակին, հայտարարել է կառավարությունը ղեկավարելու իր պատրաստակամության մասին։
Մեկ այլ ընդդիմադիր կուսակցություն՝ «Ճապոնիայի վերականգնման հասարակությունը», որի մասնակցությունը անհրաժեշտ է կոալիցիա կազմելու համար, կողքից է դիտարկում իրավիճակը: «Եթե ՍԴԿ-ն լրջորեն է տրամադրված ԺԴԿ-ին կոալիցիա կազմելու հարցում համոզելու համար, ապա մենք ուշադիր նրանց կլսենք», – ասել է առաջնորդ Հիրոֆումի Յոշիմուրան՝ նշելով, որ համաձայնության հասնելու հավանականությունը «շատ բարձր չէ»:
Թարգմանությունը՝ Անահիտ Խաչատրյանի
