28.04.2026 | 21:14
ՔՊ-ն ԱԺ պետաիրավական հարցերի մշտական հանձնաժողովի նախագահի թեկնածու է առաջադրել
Էրդողանը հայտնել է, որ Թուրքիան կմիանա Գազայի հատվածում հրադադարի պահպանմանը հետևող մոնիթորինգի խմբին
Քաղաքականություն
09.10.2025 | 20:41
Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան կմիանա Գազայի հատվածում հրադադարի համաձայնագրի կատարումը վերահսկող խմբին և կաջակցի վերակառուցման ջանքերին միջազգային հանրության հետ միասին, գրում է Turkiye today-ը:
«Մենք մանրակրկիտ կհետևենք համաձայնեցված պայմանների կատարմանը։ Մենք կմասնակցենք համաձայնագրի տեղում կատարմանը հետևող աշխատանքային խմբին»,- ասել է Էրդողանը։
Թուրքիայի նախագահը գոհունակություն է հայտնել Շարմ էլ Շեյխից ստացված լավ լուրերի կապակցությամբ։
«Մենք երկար ժամանակ ինտենսիվորեն աշխատում էինք Գազայում արյունահեղությունը դադարեցնելու և հրադադար հաստատելու ուղղությամբ։ Սկզբում մենք Նյու Յորքում ՄԱԿ-ի Գլխավոր վեհաժողովում հանդիպում անցկացրինք Գազայի հարցով, որին ներկա էր նաև Թրամփը։ Այնուհետև, Վաշինգտոն այցի ընթացքում, մենք կրկին քննարկեցինք Գազայի հարցը Թրամփի և նրա պատվիրակության հետ Սպիտակ տանը։ Ավելի ուշ պարոն Թրամփը հայտարարեց 20 կետանոց խաղաղության ծրագրի մասին, իսկ ՀԱՄԱՍ-ը հայտարարեց, որ պատրաստ է բանակցությունների։ Երեկվա համաձայնագրից հետո ստորագրություններն այսօր դրվեցին»,- ասել է նա։
Էրդողանը հավելել է, որ Թուրքիան միջազգային հանրության հետ համատեղ կաջակցի վերակառուցման աշխատանքներին, որպեսզի Գազան կրկին ոտքի կանգնի, նշելով. «Մեր նպատակն է դադարեցնել ցեղասպանությունը և հնարավորինս շուտ խաղաղություն բերել տարածաշրջան»։
Հավելենք, որ ավելի վաղ Էրդողանը գոհունակություն էր հայտնել, որ Իսրայելը և ՀԱՄԱՍ-ը համաձայնության են եկել Գազայում հրադադարի առաջին փուլի շուրջ և շնորհակալություն հայտնել ԱՄՆ նախագահ Դոնալդ Թրամփին՝ պատերազմը դադարեցնելու ջանքերի համար։
Թարմանությունը՝ Էմմա Չոբանյանի
