Մադրիդում շենքի փլուզման հետևանքով չորս մարդ է զոհվել

Իսպանիայի մայրաքաղաք Մադրիդի կենտրոնում վերանորոգվող շենքի մասնակի փլուզման հետևանքով զոհերի թիվը հասել է 4-ի։ Քաղաքային արտակարգ իրավիճակների ծառայությունը X սոցիալական հարթակում հայտնել է, որ փլատակներից դուրս է բերվել ևս երկու մարմին։ Ավելի վաղ հայտնաբերվել էր երկու զոհի մարմին, գրում է DW-ի ռուսական ծառայությունը։

El Pais-ի տվյալներով՝ առաջին հարկում հայտնաբերվել է մի կին՝ վարչական աշխատող։ Մյուսները՝ 30-ից 50 տարեկան տղամարդիկ, ծագումով Մալիից, Գվինեայից և Էկվադորից են։ Նրանցից երկուսը, ըստ երևույթին, նկուղում են եղել, իսկ երրորդը՝ վերին հարկերից մեկում։ Բոլորը ANKA շինարարական ընկերության աշխատակիցներ են։ Գործընկերները պնդում են, որ «նրանք պայմանագրեր ունեին և ամսական մոտ 1100 եվրո աշխատավարձ էին ստանում»։

DPA լրատվական գործակալության տվյալներով՝ վիրավորվել է առնվազն երեք աշխատող։

Վեցհարկանի շենքը գտնվում է Մադրիդի կենտրոնական Պլազա Մայոր հրապարակի և մետրոյի Օպերա կայարանի մոտ։ Փլուզումը տեղի է ունեցել հոկտեմբերի 7-ին՝ տեղական ժամանակով 13:00-ի սահմաններում։

Դեպքի պահին, հնարավոր է, տեղում աշխատել է 30-40 մարդ։ Ականատեսները հայտնել են բարձր պայթյունի նման ձայնի և փոշու խիտ ամպի մասին։ Արտակարգ իրավիճակների ծառայությունները կայունացրել են շենքի ճակատային մասը, որից հետո Մադրիդի հրշեջները սկսել են շների հետ որոնել անհետ կորածներին:

Մադրիդի քաղաքապետ Խոսե Լուիս Մարտինես-Ալմեյդան պարզաբանել է, որ «վեցերորդ հարկը փլուզվել է», ինչը հանգեցրել է նաև շենքի մասնակի փլուզման։ Քաղաքապետը ժամանել է դեպքի վայր՝ դադարեցնելով Լոնդոն կատարած իր այցը։ Նա բացատրել է, որ շինարարական աշխատանքները թույլատրվել են փետրվարից։

«Քաղաքաշինության տեսանկյունից փաստաթղթերը կարգին էին, և վերանորոգման աշխատանքները կատարվել են տրված թույլտվության համաձայն»,- հավելել է նա։

Անհետ կորածների որոնումները շարունակվում են, զոհերի թիվը կարող է աճել։ Փլուզման պատճառը հետաքննվում է։

El Pais-ի հաղորդմամբ՝ շենքը կառուցվել է 1965 թվականին։ Այն դատարկ էր և վերանորոգվում էր՝ որպես չորսաստղանի հյուրանոց բացելու համար։

Թարգմանությունը՝ Էմմա Չոբանյանի