29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
ԵՄ մշտական ներկայացուցիչները հոկտեմբերի 8-ին կքննարկեն ռուս դիվանագետների տեղաշարժի սահմանափակումների հարցը
Քաղաքականություն
07.10.2025 | 21:37
ԵՄ երկրների մշտական ներկայացուցիչները հոկտեմբերի 8-ին կքննարկեն ռուս դիվանագետների համար Եվրամիության տարածքում հնարավոր տեղաշարժի սահմանափակումները: Այս միջոցառումը քննարկվում է որպես Ռուսաստանի դեմ ԵՄ 19-րդ պատժամիջոցների փաթեթի մաս:
Չեխիան, որը նախաձեռնել է այս միջոցառումը, ակնկալում է, որ այս կետը նոր պատժամիջոցների փաթեթում ներառելու որոշումը կհաստատվի մշտական ներկայացուցիչների հաջորդ նիստում, հայտնել է DW-ի դիվանագիտական աղբյուրը։
Երբ DW-ի թղթակիցը խնդրել է մեկնաբանել Financial Times-ի (FT) հոդվածը, որտեղ նշվում էր, որ ԵՄ երկրները համաձայնել են սահմանափակել ռուս դիվանագետների տեղաշարժը, աղբյուրը հրաժարվել է հաստատել հաղորդագրությունը՝ նման եզրակացությունները համարելով վաղաժամ և հղում անելով առաջիկա քննարկումներին: Այս որոշումը չի հաստատվել մշտական ներկայացուցիչների նախորդ՝ հոկտեմբերի 3-ին կայացած նիստում։
Ռուս դիվանագետների ազատ տեղաշարժի սահմանափակումը միակ վիճահարույց կետը չէ 19-րդ պատժամիջոցների փաթեթում: Մինչև ԵՄ երկրները համաձայնության չգան նոր փաթեթի բոլոր կետերի շուրջ, Ռուսաստանի դիվանագիտական առաքելությունների աշխատակիցների տեղաշարժը սահմանափակելու վերաբերյալ վերջնական որոշում չի կայացվի, հաղորդում է DW-ի թղթակիցը Բրյուսելից:
Ավելի վաղ FT-ն, հղում անելով աղբյուրներին, հաղորդել էր, որ ԵՄ երկրները համաձայնել են ռուս դիվանագետների համար ճանապարհորդության սահմանափակումներ կիրառել: FT-ի տվյալներով՝ նոր կանոնները կպահանջեն, որ եվրոպական երկրներում աշխատող դիվանագետները նախապես տեղեկացնեն իշխանություններին իրենց ճանապարհորդության ծրագրերի մասին: FT-ի տվյալներով՝ Հունգարիան, որը դեմ էր այդ քայլին, հետ է վերցրել իր առարկությունները։
FT-ն նաև մեջբերել է ԵՄ բարձրաստիճան դիվանագետի, որը նշել է, որ դիվանագետների համար ճանապարհորդության սահմանափակումները դիվերսիաների փորձերի աճի պատասխան են։
Հետախուզական գործակալությունների տվյալներով՝ դրանք «հաճախ կատարվում են դիվանագիտական քողի տակ գործող լրտեսների կողմից», և հանցագործները «գտնվում են մեկ տեղում, բայց գործում են մեկ այլ վայրում», գրել է FT-ն։ Սա կարող է ավելի դժվարացնել հատուկ ծառայությունների համար նրանց տեղաշարժերի մոնիթորինգը սահմանները հատելիս։ Չեխիան, որը նմանատիպ միջոցառումներ է ձեռնարկել իր տարածքում, այս դիրքորոշումը պաշտպանում է Բրյուսելում ավելի քան մեկ տարի։
Հոկտեմբերի 7-ին Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ Մոսկվան կարձագանքի Բրյուսելի՝ ռուս դիվանագետների տեղաշարժը Եվրամիության ներսում սահմանափակելու որոշմանը։
Թարգմանությունը՝ Էմմա Չոբանյանի
