ՌԴ-ն հարվածներ է հասցրել Ուկրաինայի էներգետիկ ենթակառուցվածներին․ 4 շրջաններում տասնյակ հազարավոր մարդիկ մնացել են առանց էլեկտրաէներգիայի

ՌԴ զորքերը հոկտեմբերի լույս 7-ի գիշերը ռուսական զորքերը հարվածներ են հասցրել Ուկրաինայի էներգետիկ և երկաթուղային ենթակառուցվածքներին։ Այս մասին այտնել է Ուկրաինայի վերականգնման հարցերով փոխվարչապետ Ալեքսեյ Կուլեբան: Ուկրաինայի ռազմաօդային ուժերի տվյալներով՝ Ռուսաստանն Ուկրաինայի ուղղությամբ արձակել է երկու «Իսկանդեր-Մ/ԿՆ-23» բալիստիկ հրթիռ և 152 անօդաչու թռչող սարք, գրում է Current time-ը։

Պոլտավայի և Սումիի մարզերը ենթարկվել են զանգվածային հարձակումների: Պոլտավայում վնասվել են լոկոմոտիվային դեպո, էլեկտրամատակարարման գծեր, քարշակման ենթակայաններ, վարչական և պահեստային շենքեր և շարժակազմ: Հարձակումը ժամանակավորապես հետաձգել է Խարկով-Լվով, Լվով-Խարկով և Կրամատորսկ-Լվով գնացքների երթևեկությունը, սակայն երթևեկությունն այժմ վերսկսվել է:

Կուլեբան նաև հայտնել է, որ վնասվել է էներգետիկ օբյկետ, որի հետևանքով Պոլտավայում և մոտակա քաղաքներում հազարից ավելի տնային տնտեսություններ զրկվել են էլեկտրաէներգիայից։ Նմանատիպ իրավիճակ է ստեղծվել նաև Սումիում, քաղաքի որոշ հատվածներում վնասվել են բնակելի շենքեր, և  էլեկտրաէներգիայի անջատումներ են գրանցվել քաղաքի մի մասում։

«Երկաթուղային երթևեկությունը կայունացել է, կարևորագույն ենթակառուցվածքները աստիճանաբար վերադառնում են շահագործման»,- գրել է նա:

Բացի այդ, հարձակման է ենթարկվել Չեռնիգովի մարզի էներգետիկ օբյեկտներից մեկը։ «Չեռնիգիվոբլենէրգո»-ն հայտնել է, որ հարվածի հետևանքով ավելի քան 61,000 բաժանորդ մնացել է առանց էլեկտրաէներգիայի: Ռուսական հարձակումը նաև 10,387 բաժանորդ է առանց էլեկտրաէներգիայի թողել Խարկովի Նեմիշլյանսկի և Ինդուստրալնի շրջաններում։ Այս մասին հայտնել է տարածաշրջանային ռազմական վարչակազմի ղեկավար Օլեգ Սինեգուբովը:

Խերսոնի շրջանում վերջին 24 ժամվա ընթացքում ռուսական հարձակումների հետևանքով զոհվել է երկու մարդ, ևս 18-ը՝ վիրավորվել։ Վիրավորների թվում կան երեք երեխաներ։ Վնասվել են երկու բազմահարկ շենքեր, 139 մասնավոր տուն, օժանդակ շինություններ և ենթակառուցվածքներ։

Թարգմանությունը՝ Էմմա Չոբանյանի