09.06.2026 | 00:17
Մարկո Ռուբիոն շնորհավորել է Փաշինյանին
Քաղբանտարկյա՞լ է Աջապահյանը․ 2 տարվա ազատազրկում, սխալ ընթերցված հոդված, թեժ հակադարձումներ․ ՏԵՍԱՆՅՈՒԹ
Քաղաքականություն
06.10.2025 | 20:15
«Ամո՛թ, ամո՛թ». այս վանկարկումով արձագանքեց դահլիճը Շիրակի թեմի առաջնորդ Միքայել արքեպիսկոպոս Աջապահյանի դատավճռին․ դատավոր Արմինե Մելիքսեթյանը ուրբաթ հրապարակեց վերջնական դատական ակտը, ընդ որում՝ ընթերցելիս սխալ հոդված մատնանշելով։
Դատավորն ակնհայտ հուզված և լարված էր, ինչի պատճառով իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերի հոդվածով ամբաստանյալի աթոռին հայտնված Աջապահյանը, փաստորեն, դատապարտվեց պաշտոնատար անձի կողմից ձեռնարկատիրական գործունեությանն ապօրինի մասնակցելու հոդվածով։
Ընդամենը 10 նիստով վերդիկտ. լրացուցիչ մեկ նիստից հետո էլ՝ դատավճիռ։ Աջապահյանի ճակատագիրը փոխելու համար պաշտպանական թիմը բողոքարկման բոլոր տարբերակները ձեռնարկում է։
Գլխավոր դատախազությունը ևս, հնարավոր է, բողոքարկի վճիռը, քանի որ պահանջում էր 2 տարի 6 ամիս ժամկետով ազատազրկում։ Դատախազությունից Factor TV-ին փոխանցեցին, որ դատական ակտը ստանալուց հետո կքննարկվի վերաքննիչ բողոք ներկայացնելու հարցը։ Եվ մինչ դատավարական կողմերը քննարկում են դատավճռի իրավական կողմը, քաղաքական հակադիր բևեռներում գտնվող ուժերը յուրովի են մեկնաբանում իրավիճակը. «Ինքը քաղբանտարկյալ է», «ՀՀ-ում քաղբանտարկյալներ չկան»։
Ընդդիմադիր պատգամավոր Հայկ Մամիջանյանը պնդում է՝ Աջապահյանի մասով խայտառակ ապօրինի որոշում է կայացվել։ Իշխանական պատգամավոր Արփի Դավոյանն էլ հակադարձում է։
«Ազգային ճգնաժամի և կառավարման ձախողման մասին» ՀՀ ԱԺ հայտարարության նախագծի քննարկման ընթացքում այսօր բանավեճ ծավալվեց նաև հեղափոխություն և հեղաշրջում տերմիների տարբերության շուրջ։
Արդյո՞ք Միքայել արքեպիսկոպոս Աջապահյանն ու իր պաշտպանական թիմը կհասնեն իրենց համար ցանկալի արդյունքի Վերաքննիչ և վերադաս ատյաններում, պարզ կդառնա առաջիկայում, իսկ մինչ այդ՝ Շիրակի թեմի առաջնորդը կալանքի տակ է, իսկ թեմը՝ առանց Սրբազանի։
Մանրամասները՝ տեսանյութում։
Ռոզա Վարդանյան
