16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Ալեն Սիմոնյանն «արխիվ է» ուղարկում Անդրանիկ Քոչարյանի զեկույցը
Քաղաքականություն
06.10.2025 | 14:50
Ազգային ժողովի նախագահ Ալեն Սիմոնյանը «իրավական շահագրգիռ կողմերի հետ քննարկումների արդյունքում որոշում է կայացվել զեկույցն ուղարկել ԱԺ-ի արխիվ»։ Այս մասին Factor.am-ի հարցին ի պատասխան ասաց ՀՀ ԱԺ նախագահի մամուլի խոսնակ Մովսես Հարությունյանը։
«Հաշվի առնելով հանգամանքը, որ 44-օրյա պատերազմի հանգամանքներն ուսումնասիրող քննիչ հանձնաժողովի զեկույցը ժամկետների անհամապատասխանության պատճառով իրավական առումով անհնար է դարձել ներառել ԱԺ լիագումար նիստերի օրակարգում, բոլոր հնարավոր իրավական շահագրգիռ կողմերի հետ քննարկումների արդյունքում որոշում է կայացվել զեկույցն ուղարկել ԱԺ-ի արխիվ, որտեղ գաղտնիության թույլտվություն ունեցող յուրաքանչյուր պատգամավոր կարող է գնալ և ծանոթանալ զեկույցին»,-ասաց նա։
Հիշեցնենք՝ որ 44-օրյա պատերազմի հանգամանքներն ուսումնասիրող քննիչ հանձնաժողովի զեկույցը ԱԺ լիագումար նիստերի ժամանակ քննարկելու հարցի շուրջ բուռն քննարկում էր սկսվել Ալեն Սիմոնյանի և հանձնաժողովի նախագահ Անդրանիկ Քոչարյանի միջև։ Մինչ այս Քոչարյանը վճռական էր տրամադրված, որ զեկույցը քննարկվի լիագումար նիստի ժամանակ և չէր ընդունում Սիմոնյանի այն պարզաբանումը, թե զեկույցը ԱԺ նախագահին ուղարկվել է ժամկետների խախտմամբ։
Անդրանիկ Քոչարյանը Factor.am-ի հետ զրույցում ևս հաստատեց, որ նման քննարկում և որոշում եղել է, սակայն, նա նշում է՝ ոչ թե «արխիվ» է ուղարկվում, այլ «գաղտնի բաժին»։ Այս որոշումը Անդրանիկ Քոչարյանը հետքայլ չի համարում, նշում է՝ գաղտնիության ռեժիմին հասանելիություն ունեցող անձինք կարող են ծանոթանալ զեկույցի բովանդակությանը։
Նարեկ Կիրակոսյան
