19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
ԱՄՆ-ը պնդում է, որ մինչև 5000 կուբացիներ են կռվում Ռուսաստանի կողմից Ուկրաինայի դեմ պատերազմում
Քաղաքականություն
06.10.2025 | 20:38
ԱՄՆ նախագահ Դոնալդ Թրամփի վարչակազմը, դեմ լինելով ՄԱԿ-ի բանաձևի նախագծին, որը կոչ էր անում Վաշինգտոնին վերացնել Կուբայի դեմ պատժամիջոցները, պնդում է, որ մինչև 5000 կուբացիներ են կռվում Ռուսաստանի կողմից Ուկրաինայի դեմ պատերազմում։ Այս մասին հաղորդում է Reuters-ը, որին վկայակոչում է BBC-ի ռուսական ծառայությունը։
Գործակալությունը հղում է կատարում ԱՄՆ Պետքարտուղարության ներքին նամակագրությանը, որի համաձայն՝ ամերիկացի դիվանագետները կտեղեկացնեն երկրներին, որ Կուբայի կառավարությունն ակտիվորեն աջակցում է Ռուսաստանի կողմից Ուկրաինա ներխուժմանը։
Նշվում է, որ հոկտեմբերի 2-ին տասնյակ ամերիկյան դիվանագիտական առաքելություններին ուղարկված ոչ գաղտնի հեռագրում ամերիկացի դիվանագետներին հանձնարարվել է կոչ անել կառավարություններին դեմ լինել բանաձևին, որը ՄԱԿ-ի Գլխավոր վեհաժողովն ընդունել է ձայների մեծամասնությամբ 1992 թվականից ի վեր, սակայն որը հետևանքներ չի ունեցել։
Անցյալ տարի նմանատիպ բանաձևի օգտին քվեարկել էր 187 երկիր, մինչդեռ Միացյալ Նահանգները և Իսրայելը դեմ էին քվեարկել, իսկ Մոլդովան ձեռնպահ մնացել։
Այս տարի Թրամփը խստացրել է պատժամիջոցները՝ վերադարձնելով Կուբան ԱՄՆ-ի՝ ահաբեկչությունը հովանավորող պետությունների ցանկ և խստացնելով ֆինանսական ու ճանապարհորդական սահմանափակումները։
Հեռագրում նշվում է, որ ՄԱԿ-ի բանաձևը «սխալմամբ» մեղադրում է Միացյալ Նահանգներին Կուբայի խնդիրների համար։ Դրա դեմ քվեարկելը նախընտրելի է, բայց օգտակար կլինի, եթե երկրները ձեռնպահ մնան կամ չքվեարկեն, հաղորդում է Reuters-ը։
Պետքարտուղարությունը հրաժարվել է լրատվամիջոցին տրամադրել Ուկրաինայում կուբացի վարձկանների մասին մանրամասներ: Ներկայացուցիչը նշել է, որ Կուբայի իշխանությունները «չեն կարողացել պաշտպանել իրենց քաղաքացիներին ռուս-ուկրաինական պատերազմում որպես խաղաքարեր օգտագործվելուց»:
Թարգմանությունը՝ Էմմա Չոբանյանի
