29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Ուկրաինան պատրաստ չէ ԵՄ անդամակցության․ Անդրեյ Բաբիշ
Քաղաքականություն
05.10.2025 | 15:51
Չեխ միլիարդատեր և ընդդիմադիր «Անհամբեր քաղաքացիների նախաձեռնություն» (ANO) կուսակցության առաջնորդ Անդրեյ Բաբիշը, որի կուսակցությունը հաղթել է Չեխիայում կայացած խորհրդարանական ընտրություններում, հանդես է եկել Ուկրաինայի՝ Եվրամիությանը միանալու դեմ։
«Դուք պատրաստ չեք ԵՄ-ին։ Նախ մենք պետք է ավարտենք պատերազմը։ Իհարկե, կարող ենք համագործակցել Ուկրաինայի հետ, բայց դուք դեռ պատրաստ չեք անդամակցել Եվրամիությանը»,-հայտարարել է Չեխիայի նախկին վարչապետ Բաբիշը հոկտեմբերի 5-ին՝ պատասխանելով ուկրաինական Суспільне հեռուստաալիքի թղթակցի հարցին։
Խոսելով Ուկրաինային ռազմական օգնության մասին՝ Բաբիշը նշել է, որ Չեխիան աջակցում է Ուկրաինային ԵՄ-ի միջոցով։
«Եվրամիությունը օգնում է Ուկրաինային, և դա նախատեսված է ԵՄ բյուջեով։ Մենք մեծ գումարներ ենք վճարում այդ բյուջեում, և այդ կերպ էլ շարունակելու ենք աջակցել»,-պարզաբանել է ANO կուսակցության ղեկավարը։
Բաբիշի կարծիքով՝ Չեխիայի նախաձեռնած «հրետանային նախաձեռնությունը» Ուկրաինայի համար պետք է իրականացվի ՆԱՏՕ-ի միջոցով։
«Ամեն ինչ պետք է լինի թափանցիկ։ Եթե պատերազմ է ընթանում, ոչ ոք չպետք է գումար վաստակի պատերազմի վրա։ Այդ ամենը պետք է կազմակերպի ՆԱՏՕ-ն»,- ընդգծել է նա։
Բացի այդ, Բաբիշը նշել է, որ Ուկրաինային աջակցում է դեռ 2014 թվականից՝ Ռուսաստանի ագրեսիայի և Ղրիմի բռնակցման պահից ի վեր։ Նա նաև ասել է, որ երեք անգամ հանդիպել է Ուկրաինայի նախագահ Վլադիմիր Զելենսկու հետ, այդ թվում՝ 2019 թվականի նոյեմբերին։
Ընտրություններում իր կուսակցության հաղթանակից հետո Բաբիշը հայտարարել է, որ հոկտեմբերի 5-ին մտադիր է հանդիպել Չեխիայի նախագահ Պետր Պավելի հետ և «առաջարկել լուծում, որը համապատասխանում է չեխական և եվրոպական օրենսդրությանը»։
