12.01.2026 | 09:49
Թրամփը՝ «Վենեսուելայի նախագահի պաշտոնակատար»․ ԱՄՆ նախագահը truthsocial-ում լուսանկար է հրապարակել
Պուտինը սպառնում է ԱՄՆ-ի հետ կապերի խզմամբ՝ Ուկրաինային Tomahawk հրթիռների մատակարարման դեպքում
Քաղաքականություն
05.10.2025 | 15:13
ՌԴ նախագահ Վլադիմիր Պուտինը սպառնացել է ԱՄՆ-ին հարաբերությունների խզմամբ, եթե Վաշինգտոնը Ուկրաինային տրամադրի երկար հեռահարության Tomahawk տեսակի թևավոր հրթիռներ։
«Քննարկվեցին նոր զինատեսակների, այդ թվում՝ բարձր ճշգրտությամբ հեռահար համակարգերի մատակարարման հետ կապված հարցեր՝ Tomahawk-ներ և այլն։ Ես ասացի, որ դա կբերի մեր հարաբերությունների փլուզման, առնվազն՝ այն դրական միտման կորստին, որ նշմարվում էր այդ հարաբերություններում»,- հայտարարել է Պուտինը հոկտեմբերի 5-ին «Ռոսիա 1» պետական հեռուստաալիքով եթերում։
«Ես ասում եմ այն, ինչ մտածում եմ։ Բայց թե ինչպես կզարգանան իրադարձությունները Մոսկվայի և Վաշինգտոնի միջև հարաբերություններում, կախված չէ միայն մեզանից ու միայն ինձանից»,-ընդգծել է Պուտինը, որն արդեն երկու տարի շարունակում է Ուկրաինայի դեմ լայնածավալ պատերազմը։
Բրիտանական The Telegraph թերթի տվյալներով՝ Ուկրաինայի նախագահ Վլադիմիր Զելենսկին ՄԱԿ-ի Գլխավոր ասամբլեայի շրջանակում Նյու Յորքում տեղի ունեցած փակ հանդիպման ժամանակ խնդրել է ԱՄՆ նախագահ Դոնալդ Թրամփին Ուկրաինային փոխանցել Tomahawk հրթիռներ։ Զելենսկին նշել է, որ այդ հրթիռները «կօգնեն համոզել ՌԴ նախագահ Վլադիմիր Պուտինին նստել բանակցային սեղանի շուրջ և քննարկել խաղաղության պայմանագիրը»։
The Wall Street Journal-ը հոկտեմբերի 1-ին գրել էր, որ ԱՄՆ-ն համաձայնեցրել է Ուկրաինային հետախուզական տվյալների փոխանցումը, որոնք անհրաժեշտ են ՌԴ էներգետիկ ենթակառուցվածքների վրա հեռահար հրթիռային հարվածներ հասցնելու համար՝ այդ օբյեկտները գտնվում են սահմանից բավական հեռու։ Ըստ պարբերականի՝ այդ քայլը ձեռնարկվել է Թրամփի վարչակազմում Ուկրաինային հեռահար զինատեսակներ տրամադրելու հնարավորության շուրջ քննարկումների ֆոնին։
Reuters գործակալությունն իր հերթին հայտնել է, որ Ուկրաինային Tomahawk հրթիռների մատակարարումը քիչ հավանական է, քանի որ ԱՄՆ-ի ունեցած պաշարները նախատեսված են հիմնականում ԱՄՆ Ռազմածովային ուժերի և այլ նպատակների համար։ Ավելի հավանական է, որ Ուկրաինան ստանա ավելի կարճ հեռահարության հրթիռներ, նշել են գործակալության աղբյուրները։ Tomahawk-ների թռիչքի շառավիղը կախված մոդիֆիկացիայից կարող է հասնել մինչև 5500 կմ։ Նշենք, որ Ուկրաինան 2024 թվականին ստացել էր ATACMS տեսակի հրթիռներ, որոնք կարող են խոցել մինչև 300 կմ հեռավորության վրա գտնվող թիրախներ։
