16.02.2026 | 20:40
Բարձր եմ գնահատում Լիտվայի աջակցությունը Հայաստանին. ՀՀ նախագահ
Իսրայելի ռազմածովային ուժերը կալանել են Գազա հումանիտար օգնություն տեղափոխող նավատորմի վերջին նավը
Քաղաքականություն
03.10.2025 | 17:05
«Գլոբալ Սումուդ» (Global Sumud) նավատորմի ակտիվիստները, որոնք փորձում էին մարդասիրական օգնություն հասցնել Գազայի հատված, ուրբաթ հայտարարել են, որ Իսրայելի ռազմածովային ուժերը կանգնեցրել են իրենց վերջին նավակը շրջափակված ափամերձ տարածք հասնելուց կարճ ժամանակ առաջ, գրում է DPA գործակալությունը։
«Գլոբալ Սումուդ» նավատորմի վերջին նավը՝ «Մարինետը», կանգնեցվել է տեղական ժամանակով 10:29-ին՝ Գազայից մոտավորապես 42.5 ծովային մղոն հեռավորության վրա՝ ըստ նավատորմի կազմակերպիչների հայտարարության։
Պաղեստինամետ կազմակերպության կողմից հրապարակված տեսանյութում երևում է, թե ինչպես է իսրայելական նավը մոտենում ակտիվիստների նավին, իսկ երբ զինվորները նստում են նավ կադրերն ընդհատվում են։ Ըստ հաղորդումների՝ նավը տեխնիկական խնդիրներ է ունեցել և հետևել է նավատորմին։ Մինչ այս, կանգնեցվել էին նավատորմի մյուս 42 նավակները Միջերկրական ծովում։
Իսրայելի իշխանությունները ձերբակալել են տասնյակ երկրներից անձնակազմի ավելի քան 400 անդամների, այդ թվում՝ շվեդ ակտիվիստ Գրետա Թունբերգին։ Հայտարարվել է, որ նրանց կուղարկեն իրենց երկրներ։
Ակտիվիստները ցանկանում էին օգնությունն ուղղակիորեն հասցնել Գազայի հատվածի բնակչությանը և բողոքել են Իսրայելի կողմից շրջափակված տարածքում իրականացվող ռազմական արշավի դեմ։ Նրանք մերժել են Իսրայելի առաջարկը՝ մատակարարումները Գազա ուղղորդել իսրայելական նավահանգիստներով՝ ասելով, որ Իսրայելի կողմից Գազայի հատվածի շրջափակումն անօրինական է։
Ըստ տեղեկությունների՝ պաղեստինամետ մեկ այլ նավատորմ արդեն լքել է Եվրոպան և ուղևորվում է դեպի Գազայի հատված։ Հաղորդվում է, որ ինը նավերն ուրբաթ առավոտյան Կրետեի ափերի մոտ են եղել։
Թարգմանությունը՝ Էմմա Չոբանյանի
