11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Իսրայելը կանգնեցրել է Գազա օգնություն տանող «Գրետա Թունբերգի նավատորմի նավերը»․ Գրետան և մյուս ակտիվիստները ձերբակալվել են․ ՏԵՍԱՆՅՈՒԹ
Քաղաքականություն
02.10.2025 | 15:49
Իսրայելի ռազմածովային ուժերը չորեքշաբթի երեկոյան և հինգշաբթի գիշերը սկսել են ձերբակալել «Գրետա Թունբերգի նավատորմին» պատկանող նավերը, երբ դրանք մոտեցել են Գազայի հատվածի ափերին, և ափ են տեղափոխել ձախակողմյան ակտիվիստներին, այդ թվում՝ Գրետային, հետագա արտաքսման համար, գրում է BBC -ի ռուսական ծառայությունը։
Իսրայելի արտաքին գործերի նախարարությունը չորեքշաբթի երեկոյան հայտարարել է, որ Իսրայելի ռազմածովային ուժերը սկզբում զգուշացրել են նավատորմի առաջատար նավերին, որ նրանք մոտենում են մարտական գոտուն, և պահանջել են փոխել ուղղությունը։ Այնուհետև նրանք կանգնեցրել են մի քանի նավեր, բարձրացել դրանց վրա և սկսել ձերբակալել ու պաղեստինամետ ակտիվիստներին տեղափոխել Աշդոդի նավահանգիստ։
«Գլոբալ Սումուդ» նավատորմի (սումուդ նշանակում է «դիմադրություն») կայքը հաղորդել է, որ նավատորմի 44 նավերից 9-ը ձերբակալվել են։ Նավատորմի մամուլի ծառայությունը հայտարարել է, որ նավերի ձերբակալումն անօրինական է և իսրայելական զինվորականների կողմից «հուսահատության անամոթ ակտ»։
«Սա հստակ ցույց է տալիս, թե ինչպիսի քայլերի են պատրաստ օկուպանտները գնալու՝ ապահովելու համար, որ Գազան շարունակի մնալ սովամահության և շրջափակման մեջ։ Նրանք պատրաստ են հարձակվել խաղաղ քաղաքացիական առաքելության վրա, քանի որ մարդասիրական օգնության հաջող մատակարարումը կնշանակեր նրանց շրջափակման ձախողում»,- ասվում է հայտարարության մեջ։
Իսրայելը հայտարարել է, որ Գազայի ծովային շրջափակումը ճեղքելու և փոքր նավակներով համեմատաբար փոքր քանակությամբ սնունդ հասցնելու փորձը զուտ շոու էր, և այդ նավերով ճանապարհորդող ակտիվիստներին առաջարկել է հնարավորություն՝ բեռնաթափել իրենց մարդասիրական օգնությունը Իսրայելի նավահանգստում և, ստուգումից հետո, այն ցամաքային ճանապարհով տեղ հասցնել, սակայն նրանք հրաժարվել են։
Իսրայելի արտաքին գործերի նախարարությունը հրապարակել է Գրետա Թունբերգի մասնակցությամբ տեսանյութ: Նա նստած է նավակի տախտակամածին իսրայելցի զինվորի կողքին, որը նրան բաճկոն և ջուր է տալիս:
Նավատորմի կազմակերպիչները հայտարարել են, որ ձերբակալված նավերը գտնվում էին Գազայի հատվածից 70 ծովային մղոն (ավելի քան 126 կիլոմետր) հեռավորության վրա և սպասում էին, որ ափ կհասնեն հինգշաբթի առավոտյան։ Նրանք մեղադրել են իսրայելցի նավաստիներին նավատորմի կապը խլացնելու մեջ՝ սոցիալական ցանցերում ուղիղ հեռարձակումը կանխելու համար։
Իսրայելը արդեն երկու անգամ՝ հունիսին և հուլիսին, խափանել է պաղեստինամետ ակտիվիստների փորձերը՝ ճեղքելու Գազայի ծովային շրջափակումը, կալանավորելով նավերը, ապա արտաքսելով դրանցում գտնվողներին, այդ թվում՝ Գրետա Թունբերգին։
Գազայի հատվածում պատերազմի սկզբից ի վեր Իսրայելը պնդում է, թե ՀԱՄԱՍ-ը յուրացնում է Գազայի հատված մտնող արտասահմանյան մարդասիրական օգնության մեծ մասը: Այս տարվա գարնանից ի վեր այն վերահսկողություն է հաստատել օգնության մատակարարումների նկատմամբ՝ Միացյալ Նահանգների հետ համատեղ ստեղծելով հատուկ կազմակերպություն:
Գրետա Թունբերգի ուղեկցությամբ նավերն Իսրայելի կողմից ձերբակալման վերաբերյալ Ֆրանսիայի արտգործնախարար Ժան-Նոելը հայտարարել է, որ Ֆրանսիան ստացել է երաշխիքներ, որ ձերբակալությունները կկատարվեն առավելագույնս անվտանգ եղանակով:
Իտալիայի արտգործնախարար Անտոնիո Տայանին նույնպես հայտարարել է, որ նմանատիպ երաշխիքներ է ստացել Իսրայելի արտգործնախարար Գիդեոն Սաարից:
Գազա մեկնող նավատորմի նավերով ճանապարհորդող մոտ 500 պաղեստինամետ ակտիվիստների թվում են Իտալիայից և Ֆրանսիայից քաղաքական գործիչներ:
Թարգմանությունը՝ Էմմա Չոբանյանի
