06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
ԱՄՆ-ի կողմից Ուկրաինային Tomahawk հեռահար հրթիռների մատակարարումը քիչ հավանական է․ Reuters
Քաղաքականություն
03.10.2025 | 13:55
ԱՄՆ նախագահ Դոնալդ Թրամփի վարչակազմը դժվար թե կարողանա Ուկրաինային փոխացել հեռահար Tomahawk հրթիռները։ Այս մասին հայտնում է Reuters-ը՝ հղում անելով ամերիկացի պաշտոնյայի և երեք այլ աղբյուրների, փոխանցում է Meduza-ն։
Ամերիկացի պաշտոնյան ընդգծել է, որ Վաշինգտոնը Tomahawk հրթիռների պակաս չունի, որոնց հեռահարությունը մինչև 2500 կիլոմետր է, սակայն առկա պաշարները նախատեսված են ԱՄՆ ռազմական և այլ նպատակների համար։ Աղբյուրի խոսքով՝ Վաշինգտոնը կարող է դիտարկել եվրոպացիներին այլ հեռահարության զենքեր գնելն ու դրանք Կիևին մատակարարելը թույլ տալու հնարավորությունը, սակայն Tomahawk հրթիռների մատակարարումը քիչ հավանական է։ ԱՄՆ-ը, հավանաբար, Ուկրաինային կտրամադրի ավելի փոքր հեռահարության հրթիռների այլ տարբերակներ։
Սեպտեմբերի վերջին Ուկրաինայի նախագահ Վլադիմիր Զելենսկին Նյու Յորքում ՄԱԿ-ի Գլխավոր վեհաժողովի շրջանակում Դոնալդ Թրամփի հետ փակ հանդիպման ժամանակ խնդրել էր Ուկրաինայի զինված ուժերին տրամադրել Tomahawk հրթիռներ: Զելենսկին կարծում է, որ Ուկրաինայի տարածքում Մոսկվային հարվածելու ունակ հրթիռների տեղակայումը կստիպի Ռուսաստանի նախագահ Վլադիմիր Պուտինին նստել բանակցությունների սեղանի շուրջ և քննարկել խաղաղության համաձայնագիրը։
ԱՄՆ փոխնախագահ Ջեյ Դի Վենսը սեպտեմբերի 29-ին հայտարարել էր, որ Վաշինգտոնը վերանայում է Կիևի՝ այդ հրթիռների մատակարարման հարցումը։
Վլադիմիր Պուտինն իր հերթին հայտարարել է, որ Ուկրաինային Tomahawk հրթիռների մատակարարումը և դրանց կիրառումը «բացարձակապես չի փոխի ուժերի հավասարակշռությունը մարտադաշտում», սակայն վնաս կհասցնի ռուս-ամերիկյան հարաբերություններին, «որոնցում թունելի վերջում որոշակի լույս էր երևում»։
The Wall Street Journal-ն էլ հայտնել էր, որ ԱՄՆ նախագահ Դոնալդ Թրամփը թույլ է տվել Ուկրաինային տրամադրել հետախուզական տվյալներ՝ Ռուսաստանի էներգետիկ ենթակառուցվածքներին հրթիռային հարվածներ հասցնելու համար։
Թարգմանությունը՝ Էմմա Չոբանյանի
