01.11.2026 | 10:05
ՀՀ տարածքում ավտոճանապարհներն անցանելի են
ԱՄՆ մաքսային ու սահմանային պաշտպանության ծառայության թիմը Հայաստան է ժամանել
Քաղաքականություն
03.10.2025 | 11:56
Հայաստան են այցելել ԱՄՆ մաքսային և սահմանային պաշտպանության ծառայության ներկայացուցիչները։ Այս մասին հայտնում են ՀՀ-ում ԱՄՆ դեսպանատնից։
«Սեպտեմբերի 29-ից հոկտեմբերի 11-ը ԱՄՆ մաքսային և սահմանային պաշտպանության ծառայության թիմը կաշխատի ՀՀ սահմանապահ ուժերի հետ՝ իրականացնելու կարողությունների գնահատում և բացահայտելու բարելավման կարիք ունեցող ուղղությունները՝ «Բացերի/հնարավորությունների վերլուծության գործընթացի» միջոցով։ Այս վերլուծական մեթոդաբանությունը, որը հաջողությամբ կիրառվել է այլ վայրերում, կօգնի ամրապնդել սահմանների անվտանգությունը՝ հստակեցնելով ռազմավարական ներդրումներ պահանջող ուղղությունները։ Հպարտ ենք աջակցել այս առաջին քայլին՝ ուղղված «Խաղաղության խաչմերուկ» կարողությունների զարգացման ոլորտում մեր գործընկերության իրագործմանը, որի մասին հուշագիրը ստորագրվեց նախագահ Թրամփի և վարչապետ Փաշինյանի միջև օգոստոսի 8-ին Սպիտակ տանը»,- ասված է դեսպանատան տարածած հաղորդագրությունում։
Ավելի վաղ Factor.am-ի գրավոր հարցում էր ուղարկել արտաքին գործերի նախարարություն՝ տեղեկանալու՝ արդյոք ԱՄՆ մաքսային և սահմանային պարեկային թիմն այցելել է Հայաստան, որի մասին դեռևս հունվարին հայտարարել էր ԱՄՆ նախկին պետքարտուղար Բլինքենը։
Արտաքին գերատեսչությունից մեր հարցմանն ի պատասխան արձագանքել էին՝ նշելով․ «ՀՀ և ԱՄՆ-ի միջև Ռազմավարական գործընկերության կանոնադրության 3-րդ բաժնի 3-րդ կետի համատեքստում ՀՀ-ն ԱՄՆ-ի հետ համագործակցում է ԱՄՆ պետքարտուղարության Արտահանման վերահսկման և սահմանային անվտանգության ծրագրի միջոցով՝ ՀՀ ԱԱԾ սահմանապահ զորքերի և Պետական եկամուտների կոմիտեի կարողությունների զարգացման նպատակով»։
Ըստ արտգործնախարարության պատասխանի՝ համագործակցությունը, որը կրում է շարունակական բնույթ, ներառում է ինչպես ՀՀ մասնագետների վերապատրաստում, այնպես էլ տեխնիկական աջակցություն: Նախարարությունից պարզաբանել էին, որ համագործակցության շրջանակներում պարբերաբար տեղի են ունենում ինչպես ծրագրի համակարգողի այցեր ՀՀ, այնպես էլ՝ ՀՀ պաշտոնյանների այցեր ԱՄՆ։
Հիշեցնենք, որ հունվարի 1-ին Հայաստանի ու Միացյալ Նահանգների արտաքին գերատեսչությունների ղեկավարները Վաշինգտոնում ստորագրել էին ռազմավարական գործընկերության մասին կանոնադրություն։ ԱՄՆ այդ ժամանակվա պետքարտուղար Էնթոնի Բլինքենը հայտարարել էր, որ առաջիկա շաբաթներին ԱՄՆ մաքսային և սահմանային պարեկային թիմ կուղևորվի Հայաստան՝ հայ գործընկերների հետ աշխատելու սահմանային անվտանգության կարողությունների զարգացման վրա։
Մանյա Պողոսյան
