28.04.2026 | 23:24
Երևանում երթևեկության փոփոխություն կկատարվի
Ուկրաինական ԱԹՍ-ները հարված են հասցրել Պերմի «Ազոտ» քիմիական գործարանին
Քաղաքականություն
03.10.2025 | 12:14
Ուկրաինական անօդաչու թռչող սարքերը հարված են հասցրել Պերմի երկրամասի «Ազոտ» քիմիական գործարանին: Շրջանի ղեկավար Դմիտրի Մախոնինը հայտնել է, որ գործարանում «արտադրական ցիկլի կարճատև ընդհատում» է տեղի ունեցել, գրում է Meduza-ն։
Մախոնինի խոսքով՝ գործարանն արդեն վերադարձել է բնականոն աշխատանքի։
«Շրջակա միջավայրին որևէ վտանգ չկա, բնակիչների անվտանգությանը ոչինչ չի սպառնում»,- գրել է նահանգապետը տելեգրամի իր ալիքում։
Մախոնինը նաև հայտնել է, որ անօդաչու թռչող սարքի հարձակման հետևանքով վնասվել է բնակելի շենք, տուժածներ չկան։
Բերեզնիկիի քաղաքապետ Ալեքսեյ Կազաչենկոն նույնպես հայտնել է «Ազոտ» գործարանում «արտադրության կարճատև ընդհատման» մասին, սակայն չի հիշատակել անօդաչու թռչող սարքի հարվածի մասին: Ռուսական տելեգրամ ալիքների փոխանցմամբ՝ ականատեսները հայտնել են քիմիական գործարանի մոտակայքում տեղի ունեցած երկու պայթյունի մասին:
«Ազոտ» գործարանը պատկանում է «Ուրալխիմ» ընկերությանը, որն աշխարհի խոշորագույն պարարտանյութեր արտադրողներից է։ Գործարանի արտադրանքը նաև օգտագործվում է պայթուցիկ նյութերի արտադրության համար։
Ուկրաինական լրատվամիջոցները նշում են, որ Բերեզնիկիի «Ազոտ» գործարանը գտնվում է ռուս-ուկրաինական սահմանից մոտավորապես 1700 կիլոմետր հեռավորության վրա։
Ուկրաինական անօդաչու թռչող սարքերը բազմիցս հարձակվել են Ռուսաստանի ռազմարդյունաբերական համալիրի հետ կապված օբյեկտների վրա։ Դրանք նաև պարբերաբար հարվածներ են հասցնում ռուսական նավթավերամշակման գործարաններին, ինչը, այլ պատճառներից բացի, հանգեցրել է ՌԴ-ում վառելիքի պակասի և գների բարձրացման։
Թարգմանությունը՝ Էմմա Չոբանյանի
