31.10.2026 | 22:55
Հայտնաբերվել է զինծառայողի դի. ՊՆ
Ֆրանսիական ոստիկանությունը ձերբակալել է ռուսական ստվերային նավատորմի լցանավի հրամանատարին և նրա օգնականին
Քաղաքականություն
02.10.2025 | 20:44
Ֆրանսիական ոստիկանությունը ձերբակալել է Boracay լցանավի հրամանատարին, որը գտնվում է ԵՄ պատժամիջոցների տակ և, ենթադրաբար, Ռուսաստանի ստվերային նավատորմի մաս է կազմում, ինչպես նաև նրա առաջին օգնականին, գրում է Current time-ը։
Ֆրանսիական զինվորականների կողմից կանգնեցված լցանավը սեպտեմբերի 20-ին դուրս էր եկել ռուսական Պրիմորսկ նավահանգստից, անցել Բալթիկ ծովով և Դանիայի ջրերով, այնուհետև մտել Հյուսիսային ծով և ուղղություն վերցրել դեպի արևմուտք՝ Լա Մանշով։ Marine Traffic-ի տվյալների համաձայն՝ սեպտեմբերի 22-ին, երբ Կաստրուպ օդանավակայանը փակվել էր անհայտ անօդաչու թռչող սարքերի պատճառով, Boracay-ը գտնվել է Կոպենհագենից մոտավորապես 90 կմ հեռավորության վրա։
Նավը ներկայում խարիսխ է գցել Սեն Նազերի մոտ։ Ֆրանսիայի իշխանությունները հետաքննություն են սկսել։ Հաղորդվում է, որ անձնակազմը չի կարողացել ապացույցներ ներկայացնել նավի ազգային պատկանելության մասին և հրաժարվել է համագործակցել։
2007 թվականին կառուցված Boracay (Pushpa) լցանավը Մեծ Բրիտանիայի և ԵՄ պատժամիջոցների ցանկում է։ Նավը պատժամիջոցների տակ է հայտնվել ռուսական հում նավթը երրորդ երկրներ տեղափոխելու և Ուկրաինայի դեմ լայնածավալ պատերազմի ընթացքում նավթի առևտրից շահույթ ստանալու հարցում Ռուսաստանի իշխանություններին աջակցելու համար։
Մինչև 2024 թվականի դեկտեմբերը լցանավը կոչվել է Kiwala։ 2025 թվականի ապրիլին նավը ձերբակալվել էր էստոնացի զինվորականների կողմից՝ դրա կարգավիճակը և տեխնիկական վիճակը ստուգելու համար։ Անձնակազմը ներկայացրել էր Ջիբութիի դրոշի ներքո գրանցման վկայական, սակայն Ջիբութիի պաշտոնյաները չէին հաստատել այս տեղեկությունը։
Թարգմանությունը՝ Էմմա Չոբանյանի
