19.05.2026 | 15:34
Նիկոլ Փաշինյանը Տաշիրում քարոզարշավ է անում. ՈՒՂԻՂ
Հայ և ռուս ժողովուրդների բարեկամության թանգարանը փակվում է, այն կգործի ազգային պատկերասրահի կազմում՝ որպես մասնաճյուղ
Մշակույթ
02.10.2025 | 09:32
Հայաստանի կառավարությունը որոշում է կայացրել «Հայ և ռուս ժողովուրդների բարեկամության թանգարանը» վերակազմակերպել և միացնել Հայաստանի ազգային պատկերասրահին։ Պատկերասրահի կազմում Աբովյան քաղաքում կգործի նոր մասնաճյուղ՝ «Սոցիալիստական մշակույթների թանգարան» անվանումով։
Նախագիծը հեղինակել է ԿԳՄՍ նախարարությունը, որի հիմնավորումից տեղեկանում ենք՝ «Թանգարանն այս տարիներին մեծ ակտիվություն չէր ցուցաբերում և նշանակալի ցուցադրություններ չէր կազմակերպում, իր հարուստ հավաքածուներով կվերածվի նոր բովանդակությամբ մշակութային կենտրոնի։ Այստեղ կցուցադրվեն սոցիալիստական մշակույթի տարբեր դրսևորումներ՝ կերպարվեստ, դիզայն, կինո, ճարտարապետություն, կենցաղային առարկաներ ու տեսալսողական նյութեր։ Թանգարանը նպատակ ունի ներկայացնել խորհրդային ու միջազգային սոցիալիստական մշակույթի ձևավորման առանցքային փուլերը՝ համադրելով դրանք ժամանակակից դիտանկյունից»։
Թանգարանում պահվում է 886 առարկա։ Հաստիքների կրճատում նախատեսված չէ։ Տնօրենի պաշտոնը կվերափոխվի մասնաճյուղի վարիչի, իսկ հաշվապահինը՝ էքսկուրսավարի։
Նոր թանգարանը նախատեսում է հանդես գալ մշտական ու ժամանակավոր ցուցադրություններով, ինչպես նաև՝ կրթական ու հետազոտական ծրագրերով։ Կառավարության հիմնավորմամբ՝ այս փոփոխությունը կնպաստի թանգարանների կառավարման արդյունավետությանը և Աբովյանը կդարձնի ոչ միայն տեղական, այլև տարածաշրջանային մշակութային կենտրոններից մեկը։
