29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Պավել Դուրովը հայտարարել է, որ իրեն փորձել են թունավորել 2018 թվականի գարնանը, երբ ՌԴ-ում սկսել են արգելափակել Telegram-ը
Քաղաքականություն
01.10.2025 | 17:02
Telegram-ի հիմնադիր Պավել Դուրովը կարծում է, որ 2018 թվականի գարնանն իրեն փորձել են թունավորել։ Այս մասին նա հայտարարել է փոդքասթեր Լեքս Ֆրիդմանի հետ զրույցում՝ ընդգծելով, որ նախկինում երբեք հրապարակավ չի խոսել այդ մասին, քանի որ «չէր ուզում, որ մարդիկ խուճապի մատնվեն, հատկապես այդ ժամանակ», գրում է The Insider-ը։
«Այդ ժամանակ մենք փորձում էինք միջոցներ հայթայթել TON բլոքչեյն նախագծի համար։ Միաժամանակ, մի քանի երկրներ փորձում էին արգելափակել Telegram-ը, ուստի դա լավագույն ժամանակը չէր իմ առողջության մասին տեղեկատվություն տարածելու համար։ Բայց դժվար է մոռանալ դա։ Նախկինում ես երբեք չէի հիվանդանում։ Ես կատարյալ առողջություն ունեմ, հազվադեպ եմ գլխացավ կամ հազ ունենում։ Դա իմ կյանքի միակ պահն էր, երբ ես մտածում էի, որ մահանում եմ»,- ասել է Դուրովը։
Նրա խոսքով՝ այդ ժամանակ ինքն ապրում էր վարձակալած թաունհաուսում (երկիրը չի նշվում) և ուներ «տարօրինակ հարևան»։ Մի օր, տուն վերադառնալիս, ձեռնարկատերը տեսել է «ինչ-որ բան», որն այդ հարևանը թողել էր իր դռան մոտ։ Մեկ ժամ անց Դուրովը, իր խոսքով, սկսել է շատ վատ զգալ։
«Ես ցավ զգացի ամբողջ մարմնովս։ Փորձեցի վեր կենալ և գնալ լոգարան։ Բայց երբ քայլում էի, զգացի, որ մարմինս սկսեց թուլանալ։ Սկզբում տեսողությունս և լսողությունս, ապա շնչելը դժվարացավ։ Եվ այս ամեն, ուղեկցվում էր սուր ցավով»,-պատմել է Դուրովը։
Նա պատմել է, որ գիտակցությունը կորցրել է և միայն հաջորդ օրն է արթնացել, իրեն չափազանց թույլ է զգացել և նկատել է, որ «ամբողջ մարմնով արյան անոթները պայթել են»։ Դուրովի խոսքով՝ երկու շաբաթ չի կարողացել քայլել։ Որոշելով ոչինչ չասել իր թիմին՝ Telegram-ի հիմնադիրն այս ժամանակն անցկացրել է տանը մենակ։ Դուրովը չի մանրամասնել՝ արդյո՞ք դիմել է բժշկական օգնության։
2018 թվականի ապրիլին Ռոսկոմնադզորը, դատարանի որոշմամբ, ստացել էր թույլտվություն Ռուսաստանում Telegram-ն արգելափակելու համար։ Դրա պատճառը մեսենջերի վարչակազմի կողմից ԱԴԾ-ին կոդավորման բանալիները չհանձնելն էր։ Սակայն հունիսին Ռոսկոմնադզորը հայտարարել էր, որ փոխել է արգելափակելու վերաբերյալ ծրագրերը՝ դա բացատրելով Դուրովի՝ «ահաբեկչության և ծայրահեղականության դեմ պայքարի» պատրաստակամությամբ։
Թարգմանությունը՝ Էմմա Չոբանյանի
