02.07.2026 | 11:43
Նիկոլ Փաշինյանի և Ուրսուլա ֆոն դեր Լայենի համատեղ ասուլիսը՝ ՈՒՂԻՂ
Ադրբեջանի գլխավոր դատախազը մանրամասներ է հայտնել Եկատերինբուրգում ադրբեջանցիների խոշտանգումների և AZAL-ի ավիաաղետի գործերի վերաբերյալ
Քաղաքականություն
01.10.2025 | 13:15
Եկատերինբուրգում Ադրբեջանի քաղաքացիների դեմ «կատարված հանցագործությունները» հետաքննվում են ոչ միայն Ադրբեջանի դատախազության, այլև Ռուսաստանի իրավապահ մարմինների կողմից: Այս մասին ադրբեջանական լրատվամիջոցներին հայտարարել է Ադրբեջանի գլխավոր դատախազ Քյամրան Ալիևը։
Նա ընդգծել է, որ Ռուսաստանն «առանձին հետաքննություն է անցկացնում ադրբեջանցիների նկատմամբ ուժի կիրառման և խոշտանգումների վերաբերյալ»։
«Մենք համագործակցում ենք ռուսական կողմի հետ ուժի և խոշտանգումների անհիմն կիրառման վերաբերյալ։ Ես կարծում եմ, որ այս հետաքննությունը կունենա օրինական և տրամաբանական արդյունք»,- ասել է Ալիևը։
Նա նաև հայտարարել է, որ AZAL օդանավի վթարի գործով հետաքննությունը շարունակվում է։ Ադրբեջանի գլխավոր դատախազը նշել է, որ Ռուսաստանը, Ղազախստանը և Ադրբեջանը համագործակցում են հետաքննության շրջանակում, և «կա հույս, որ գործի հետաքննությունը կհասնի իր տրամաբանական ավարտին»։
Հիշեցնենք, որ Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանի գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից ադրբեջանցիների խոշտանգումների և սպանության փաստով։
Բացի այդ, 2024 թվականի դեկտեմբերի 25-ին Ղազախստանի Ակտաու քաղաքի մոտակայքում վթարի էր ենթարկվել «Ադրբեջանական ավիաուղիների»՝ AZAL-ի J2-8243 չվերթի Embraer 190AR ուղևորատար օդանավը։ Դրանում եղել է 67 մարդ՝ 62 ուղևոր և անձնակազմի 5 անդամ։ Վթարի հետևանքով զոհվել է 38 մարդ, 29-ը՝ ողջ մնացել։ Աղետի պատճառը, ըստ ադրբեջանական կողմի, ռուսական հակաօդային հրթիռային հարվածն է եղել։
Թարգմանությունը՝ Էմմա Չոբանյանի
