Քաղաքական շահերի բախում՝ գնումների գործընթացում․ ինչպե՞ս կանխել կոռուպցիոն վտանգները․ՏԵՍԱՆՅՈՒԹ

Իջևանի համայնքապետարանը 2022-2024 թվականներին ավելի քան 275 մլն դրամի 17 պայմանագիր է կնքել ավագանու անդամներին փոխկապակցված ընկերությունների հետ։ Ինֆոքոմի ուսումնասիրությունից պարզ է դարձել, որ 193 մլն դրամի պատվեր կատարած «Արտարս» ընկերության սեփականատեր Արթուր Աթաբեկյանը իշխող «Քաղաքացիական պայմանագրի» ավագանու անդամ Խաչատուր Աթաբեկյանի հայրն է։  Ավագանու անդամը հայտարարագրերում չի ներկայացրել հոր մասնակցությունը և պայմանագրերը, թեև օրենքով պարտավոր էր։ Թերությունները նա բացատրել է անուշադրությամբ և 2024-ից ուղղել է։ Ավագանու անդամ Խաչատուր Աթաբեկյանն ասաց, որ հոր ընկերության հաղթելու պատճառն ամենացածր գինն առաջարկելն է։ Սա միակ դեպքը չէ։

Իջևանում համայնքապետարանը խոշոր պայմանագրեր է կնքել իշխող խմբակցության ավագանու այլ անդամներին առնչվող ընկերությունների հետ։ 

«Խաչմիշշին» ընկերությունը, որը ստացել է ընդհանուր 74 միլիոն դրամի պայմանագրեր, հիմնադրել է Միշա Համզյանը, իսկ տարբեր տարիներին սեփականատերը եղել է իշխող խմբակցության ավագանու անդամ Խաչատուր Համզյանը։ Վերջինիս առնչվող այլ ընկերություններ ևս համայնքի հետ պայմանագրեր են կնքել։  Կան նաև այլ նմանատիպ դեպքեր՝ ավագանու այլ անդամների մասնակցությամբ։ Ինչպես մնացած մյուս պատմություններում՝ մասնակիցները հայտարարում են, թե շահերի բախում չկա, թեև օրենքով պարտավոր էին Կոռուպցիայի կանխարգելման հանձնաժողովին ներկայացնել հայտարարություն։

Նմանատիպ դեպքերում ԿԿՀ-ն այլ համայնքապետների նկատմամբ արդեն կիրառում է վարչական տույժեր։ Արդյոք այսպիսի դեպքերը չեն ստեղծում քաղաքական և ֆինանսական շահերի բախման լուրջ ռիսկեր։ Factor TV-ում հրավիրել ենք քննարկում, որին մասնակցում են ԿԿՀ անդամ Արմեն Մարուխյանը, ՀՀ ԱԺ ՔՊ խմբակցության պատգամավոր Արուսյակ Մանավազյանը, Սիվիլնեթ-ի հետաքննող լրագրող Գևորգ Թոսունյանը, Ինֆոքոմի գլխավոր խմբագիր Սևակ Մամյանը,  «Համայնքների համախմբման և աջակցության կենտրոն» ՀԿ ղեկավար Օլեգ Դուլգարյանը։

Հաղորդումն ամբողջությամբ՝ տեսանյութում։

Ռոբերտ Անանյան