05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Հայաստան–Իրան համագործակցությունը կխորանա. Գալյանն ու իրանցի գործընկերը փոխըմբռնման հուշագիր են ստորագրել
Քաղաքականություն
24.09.2025 | 22:29
Արդարադատության նախարար Սրբուհի Գալյանն ընդունել է Իրանի Իսլամական Հանրապետության արդարադատության նախարարի գլխավորած պատվիրակությանը։ Այս մասին տեղեկացնում են ՀՀ արդարադատության նախարարությունից՝ ընդգծելով, որ երկու երկրի նախարարությունների միջև տեխնիկական համագործակցության վերաբերյալ փոխըմբռնման հուշագիր է ստորագրվել։
«Սրբուհի Գալյանը, ողջունելով նախարար Ամին Հոսեյն Ռահիմիին, շնորհակալություն է հայտնել հրավերն ընդունելու համար, բարձր գնահատելով ՀՀ և ԻԻՀ միջև մինչ այժմ իրականացված արդյունավետ համագործակցությունը։ Ամին Հոսեյն Ռահիմին շնորհալություն է հայտնել հրավերի համար և նշել, որ իր կողմից բոլոր ջանքերը կգործադրի, որպեսզի արդեն իսկ առկա իրավապայմանագրային դաշտը լինի գործող և իրականացվի երկկողմ պայմանավորվածությամբ սահմանված անելիքները:
ԻԻՀ արդարադատության նախարար Ամին Հոսեյն Ռահիմին ընդգծել է երկու պետությունների արդարադատության նախարարությունների միջև համագործակցության խորացման կարևորությունը։
Հանդիպման շրջանակում կողմերը քննարկել են իրավական փոխօգնության ոլորտում առկա երկկողմ համագործակցության ընթացքում առաջացող խնդիրներին և դրանց լուծմանը, ինչպես նաև ՀՀ-ում պատիժը կրող դատապարտյալների փոխանցմանն առնչվող հարցեր:
Անդրադարձ է կատարվել Պրոբացիայի շահառու հանդիսացող ԻԻՀ քաղաքացիներին առնչվող հարցերին ու առկա խնդիրներին:
Արդարադատության ոլորտից զատ նախարարներն անդրադարձել են նաև զբոսաշրջության ոլորտին և իրանցի գործարարների կողմից ներդրումային ոլորտին ու հիմնական խնդիրներին: Նախարարն անդրադարձել է նաև սնանկության ոլորտին և նշել է, որ ներկայում աշխատանքներ են իրականացվում օրենսդրական դաշտի կարգավորման ուղղությամբ:
ԻԻՀ արդարադատության նախարարը նշել է, որ աջակցում են Հայաստանի Հանրապետության և Ադրբեջանի Հանրապետության միջև ընթացող խաղաղության գործընթացին:
Նախարարները ստորագրել են նաև «Հայաստանի Հանրապետության արդարադատության նախարարության և Իրանի Իսլամական Հանրապետության արդարադատության նախարարության միջև տեխնիկական համագործակցության վերաբերյալ» փոխըմբռնման հուշագիր, որը կնպաստի երկու երկրների միջև այս ոլորտում համագործակցության խորացմանը։
Հանդիպման ավարտին Սրբուհի Գալյանը պաշտոնական հրավեր է ստացել ԻԻՀ Ամին Հոսեյն Ռահիմիից՝ այցելելու Թեհրան»,- ասված է հաղորդագրությունում:
