ԿԸՀ նախագահ Տիգրան Մուկուչյանը ԵԱՀԿ/ԺՀՄԻԳ զեկույցում բացասական գնահատականներ չի տեսնում

Կենտրոնական ընտրական հանձնաժողովի նախագահ Տիգրան Մուկուչյանը, factor.am-ի հետ զրույցում անդրադառնալով խորհրդարանական ընտրությունների վերաբերյալ ԵԱՀԿ/ԺՀՄԻԳ զեկույցին, վստահեցնում է, որ այն ՙբոլորովին էլ բացասական չէ, հավասարակշռված է ու էապես չի տարբերվում նախորդ ընտրությունների վերաբերյալ զեկույցներից: 

«Այդ զեկույցում չի խոսվում բացասականի մասին, չի տրվում գնահատական, որ սա ինչ-որ հետընթաց էր: Էդտեղ կան գնահատականներ, որոնք ճիշտ հակառակն են վկայում»,- ասում է Տիգրան Մուկուչյանը՝ հավելելով. «Իսկ չե՞ք հանդիպել գնահատականին, որ Հայաստանում ընդհանուր պահպանված էին արդար ընտրությունների սկզբունքները: Այնպես որ շատ բալանսավորված գնահատական է տրվում արված աշխատանքներին, այնտեղ և՛ քննադատություն կա, և՛ արվում են առաջարկություններ»:

Նշենք, որ հուլիսի 10-ին ԵԱՀԿ Ժողովրդավարական հաստատությունների և մարդու իրավունքների գրասենյակը հրապարակեց ապրիլի 2-ին կայացած խորհրդարանական ընտրությունների վերաբերյալ դիտորդական առաքելության վերջնական զեկույցը, որում մատնանշվել են մի շարք թերացումներ և խախտումներ: Այսպիսով, ԵԱՀԿ/ԺՀՄԻԳ դիտորդական առաքելությունը առանձնացրել է հետևյալ խնդիրները. ԿԸՀ-ն պատշաճ կերպով չի դիտարկել բողոքները, Վարչական դատարանը մերժել է ներկայացված բոլոր բողոքները բացառապես ֆորմալ պատճառաբանություններով, բավարար ջանքեր չեն գործադրվել հանրությանը բարդ ընտրակարգի մասին իրազեկելու ուղղությամբ, ԿԸՀ-ն մերժել է միջազգային ՀԿ-ներին ընտրությունները դիտարկելու հրավերներ ուղարկելու հարցում, ինչը հակասում է ԵԱՀԿ-ի առաջ ստանձնած պարտավորություններին, քարոզչական արշավների մեծ մասը կենտրոնացել է անհատ թեկնածուների և ոչ թե քաղաքական հարթակների և քաղաքականության վրա և այլն:

«Հավաքաբար ձայներ գնելու, ընտրողների վրա ճնշումներ և բռնություններ գործադրելու լայնատարած մեղադրանքները բացասական ազդեցություն են թողել քարոզարշավի վրա և խնդրահարույց են դարձրել ընտրողների կարողությունը՝ քվեարկել ազատորեն, չվախենալով հաշվեհարդարից, որը հակասում է ԵԱՀԿ Կոպենհագենի 1990 թվականի փաստաթղթի 7-րդ կետին»,- մասնավորապես ասվում է զեկույցում:

Մանրամասները դիտեք factor.am-ի հետ ԿԸՀ նախագահ Տիգրան Մուկուչյանի հարցազրույցում:

Մարինե Խառատյան