22.05.2026 | 08:47
ԱԱԾ-ն մտել է «Մայր Հայաստան»-ի գրասենյակ և փորձել ձերբակալել Անդրանիկ Թևանյանին․ ՏԵՍԱՆՅՈՒԹ
Բայրամովը Բաքվում Ֆրանսիայի նոր դեսպանի հետ քննարկել է երկրների հարաբերություններում ճգնաժամը
Քաղաքականություն
19.09.2025 | 21:25
Ադրբեջանի արտաքին գործերի նախարար Ջեյհուն Բայրամովը այսօր հանդիպել է Բաքվում Ֆրանսիայի նորանշանակ դեսպան Սոֆի Լագուտի հետ։ Ադրբեջանի ԱԳՆ-ի հաղորդմամբ՝ դեսպան Սոֆի Լագուտը հավատարմագրերի պատճենն է հանձնել Բայրամովին։
Հանդիպման ժամանակ քննարկվել են Ադրբեջանի և Ֆրանսիայի միջև երկկողմ և բազմակողմ հարաբերությունների ներկա վիճակը, ինչպես նաև տարածաշրջանային և միջազգային հարցեր։ Տեղի է ունեցել մտքերի փոխանակում ադրբեջանա-ֆրանսիական հարաբերություններում ճգնաժամի պատճառների վերաբերյալ: Չնայած առկա խնդիրներին՝ ընդգծվել է փոխադարձ երկխոսության և քննարկումների շարունակականության կարևորությունը։
Բայրամովը դեսպան Սոֆի Լագուտին նաև «տեղեկացրել է հետհակամարտակային շրջանում տարածաշրջանում առկա իրավիճակի և իրողությունների, ինչպես նաև Ադրբեջանի և Հայաստանի միջև հարաբերությունների կարգավորման գործընթացի մասին»։
Հավելենք, որ Ադրբեջանի նախագահ Իլհամ Ալիևը բազմիցս տարբեր մեղադրանքներ է հնչեցրել Ֆրանսիայի և անձամբ նախագահ Էմանուել Մակրոնի հասցեին, իբր, գաղութատիրության ու այլ հանցանքների համար։
Ադրբեջանի կողմից հակաֆրանսիական պետական արշավի շրջանակում 2023 թվականի հուլիսի 6-ին ստեղծվել է Բաքվի նախաձեռնող խումբ, որը Փարիզի դեմ տարբեր միջոցառումներ է անցկացնում՝ դրանում ներգրավելով ֆրանսիական անդրծովյան տարածքների ներկայացուցիչներին։ Այն կազմակերպել է մեկ տասնյակից ավելի միջազգային համաժողովներ, որոնցից մի քանիսը՝ ՄԱԿ-ի կենտրոնակայաններում՝ Նյու Յորքում, Ժնևում և Վիեննայում, Ստամբուլում, Բաքվում։ Ադրբեջանը նաև ֆինանսավորում է Ֆրանսիայի և Կորսիկայի անդրծովյան տարածքների տարբեր ներկայացուցիչներին։ Ֆրանսիայի ներքին գործերի նախարարն էլ նախորդ տարի Բաքվին մեղադրել էր Նոր Կալեդոնիայում տեղի ունեցած անկարգություններին մասնակցության մեջ։
Թարգմանությունը՝ Էմմա Չոբանյանի
