Պուտինը հիասթափեցրեց ինձ. Թրամփ

ԱՄՆ նախագահ Թրամփը Մեծ Բրիտանիայի վարչապետ Քիր Սթարմերի հետ համատեղ մամուլի ասուլիսում հայտարարել է, որ պաշտոնը ստանձնելուց ի վեր իրեն հաջողվել է «լուծել» յոթ պատերազմ, որոնք «անլուծելի» էին և «անքննարկելի», գրում է BBC-ի ռւսական ծառայությունը։

Քանի որ ՆԱՏՕ-ի հունիսին կայացած գագաթնաժողովում դաշինքը իր վրա պարտավորություն էր վերցրել պաշտպանության վրա ծախսել իր ՀՆԱ-ի 5%-ը, Թրամփը հայտարարել է, որ Ուկրաինայում պատերազմը համարում է ամենահեշտը ավարտելու տեսանկյունից՝ վկայակոչելով Ռուսաստանի նախագահ Վլադիմիր Պուտինի հետ իր հարաբերությունները։

Թրամփը, սակայն, հավելել է․ «Նա ինձ հիասթափեցրեց»։

Օգոստոսին Թրամփը հյուրընկալել էր ՌԴ նախագահ Վլադիմիր Պուտինին Ալյասկայում՝ հույս ունենալով Ուկրաինայում հրադադարի համաձայնագրի հասնել։ Չնայած Թրամփը հայտարարել էր «նշանակալի առաջընթացի» մասին՝ խաղաղության համաձայնագիր դեռևս չի կնքվել։

Ասուլիսի ընթացքում Թրամփին հարցրել են Ուկրաինայում պատերազմը դադարեցնելուն ուղղված իր հաջորդ քայլերի մասին։ ԱՄՆ նախագահը կրկնել է իր նախորդ հայտարարությունը՝ պնդելով, որ պատերազմը տեղի չէր ունենա, եթե ինքը նախագահ լիներ, երբ Ռուսաստանը սկսեց լայնածավալ ներխուժումը։ Միևնույն ժամանակ, Թրամփը նշել է, որ սպասում է «լավ լուրերի»՝ Ուկրաինայի հարցի կարգավորման վերաբերյալ։

«Հուսով եմ՝ մենք լավ լուրեր կունենանք ձեզ համար»,- ասել է նա։

Ասուլիսի վերջում Դոնալդ Թրամփը հստակեցրել է, որ սպասում է, որ եվրոպական երկրները կնվազեցնեն իրենց կախվածությունը ռուսական նավթից՝ նախքան Վլադիմիր Պուտինի վրա հետագա ճնշում գործադրելու մասին որոշում կայացնելը։

«Ես պատրաստ եմ այլ միջոցներ ձեռնարկել, բայց ոչ այն դեպքում, երբ այն մարդիկ, որոնց համար ես պայքարում եմ, նավթ են գնում Ռուսաստանից։ Եթե նավթի գինը իջնի, շատ պարզ է՝ Ռուսաստանը կհամաձայնվի [Ուկրաինայի հարցում կարգավորմանը]»,- լրագրողներին ասել է ԱՄՆ նախագահը։

Հունգարիան և Սլովակիան ավելացրել են ռուսական նավթի գնումները այն բանից հետո, երբ Պուտինը 2022 թվականին սկսել է Ուկրաինա լայնածավալ ներխուժումը։

Թարգմանությունը՝ Էմմա Չոբանյանի