Տղե՛րք, պատասխան եք տալու, իմ համբերությունն ավարտվո՛ւմ է․ Սամվել Բաբայան. ՏԵՍԱՆՅՈՒԹ

Արցախի ՊԲ նախկին հրամանատար և Անվտանգության խորհրդի նախկին քարտուղար Սամվել Բաբայանը Factor TV-ի հետ զրույցում ասում է, որ ապաշրջափակման հարցում դեմ չէ աշխարհաքաղաքական գործընկերների հետ համագործակցությանը, սակայն ոչ սեփական շահերի զիջման հարցին․ «ԱՄՆ-ին և ՌԴ-ին դեմ չեմ, բայց դեմ եմ մեր ճանապարհները ինչ-որ մեկի հետ կիսվել․ դա միջանցք է»։ Նա հարցադրումներ է ուղղել իշխանությանը՝ ամերիկյան ներգրավման հարցով․ «ՌԴ-ն և Իրանը այսօր թույլ են, չի նշանակում՝ վաղն էլ են թույլ լինելու… Ճանապարհի անունն ուզում եք Թրամփի անունով դրեք, կուզեք՝ Փաշինյանի, հետո՞, էդ ճանապարհի շահույթները ինչո՞ւ եք կիսում ուրիշի հետ, ի՞նչ է տալու ձեզ»։
Բաբայանը պատերազմի սպառնալիքի մասին մտահոգությունները չի կիսում․ «Ադրբեջանը և Թուրքիան չեն հարձակվելու Հայաստանի վրա, էդ ստերով քիչ վախեցրեց ժողովրդին, որ պատերազմ է սպասվում»,- այս մասին նա ասում ի պատասխան այն հայտարարությունների, թե տարածաշրջանում ռազմական սպառնալիք կա։

Բաբայանը դեմ է նաև «Խաղաղության խաչմերուկ» նախաձեռնությանը․ «Դուք «Խաղաղության խաչմերուկ» ծրագրով պատերազմի եք տանում… 90 մլն շուկան հանեք այդ երկրների հսկողությունից, դա՞ է ձեր խաղաղությունը, դա ուղիղ պատերազմ է։ ՌԴ-Ադրբեջան կոնֆլիկտ կա, ՀՀ-ի ճանապարհը և երկաթուղին իրեն պետք են, բացվելու է ինքն իրեն, ինչո՞ւ եք հետևից ընկել վազել՝ որ ստորագրի էլի»։
Նա խոսել է նաև ՀՀ-ի 2026 թվականի խորհրդարանական ընտրությունների, իշխանության և ընդդիմության սպասվող մրցակցության, ներքին սոցիալական և քաղաքական հարցերի, ժողովրդավարությանը և տնտեսական ազատությանը վերաբերող այլ թեմաների մասին։

Հարցազրույցն ամբողջությամբ՝ տեսանյութում։
Ռոբերտ Անանյան