Քաղաքականություն
15.09.2025 | 14:32
Ռուսական զորքերը սեպտեմբերի 15-ի գիշերը հարվածել են Ուկրաինային երեք հրթիռով և տարբեր տեսակի 84 անօդաչու թռչող սարքով։ Այս մասին հաղորդում են Ուկրաինայի ռազմաօդային ուժերը, գրում է Current time-ը։
Ըստ ուկրաինական զինվորականների՝ ժամը 9:00-ի դրությամբ ՀՕՊ համակարգերը խոցել են 59 անօդաչու թռչող սարք, գրանցվել է հրթիռների ու 25 ԱԹՍ-ի հարված 13 վայրերում։ Ռուս զինվորականները, մասնավորապես, հարվածել են Կրամատորսկին: Քաղաքային ռազմական վարչակազմի ղեկավար Ալեքսանդր Գոնչարենկոն հայտնել է, որ քաղաքի կենտրոնական մասի վրա նետվել է երեք ավիառումբ, որի վիրավորվել է 9-ը մարդ:
Սեպտեմբերի 14-ի երեկոյան էլ ռուսական բանակը հրթիռային հարված է հասցրել Սումիի մարզի Բորոմլյանսկի համայնքի գյուղերից մեկին։
Սումիի մարզային վարչակազմի ղեկավար Օլեգ Գրիգորովի խոսքով՝ հարձակման թիրախը եղել է այն դաշտը, որտեղ աշխատել է գյուղատնտեսական տեխնիկան։ Հարվածի հետևանքով վիրավորվել են բերքահավաք իրականացնող մարդիկ։ 11 տղամարդ հոսպիտալացվել է, որոնցից մեկը ծանր վիճակում է։
Բացի այդ՝ ռուսական զորքերը հարվածներ են հասցրել Զապորոժիեի շրջանին: Մարզային ռազմական վարչակազմի ղեկավար Իվան Ֆեդորովը հայտնել է, որ հարձակման հետևանքով համայնքներից մեկը մնացել է առանց էլեկտրաէներգիայի, մասնավոր տներ են հրդեհվել:
Չեռնիգովի մարզում էլ հարվածի հետևանքով վիրավորվել է չորս փրկարար։ Այս մասին հայտնում են Ուկրաինայի արտակարգ իրավիճակների պետական ծառայությունը և Ներքին գործերի նախարարությունը։
ՆԳՆ-ն պնդում է, որ ռուս զինվորականները դիտավորյալ հարվածել են փրկարարներին, որոնք անօդաչու թռչող սարքի հարձակումից հետո մարում էին կարևոր ենթակառուցվածքային օբյեկտում բռնկված հրդեհը։
Ռուս զինվորականները չեն մեկնաբանել այս հայտարարությունը։
Թարգմանությունը՝ Էմմա Չոբանյանի
