01.04.2026 | 12:59
Բաղդադում ամերիկացի լրագրող է առևանգվել
Իմ համբերությունը Պուտինի նկատմամբ արագորեն սպառվում է․ Թրամփ
Քաղաքականություն
12.09.2025 | 21:10
ԱՄՆ նախագահ Դոնալդ Թրամփը, պատասխանելով Fox News-ի լրագրողների հարցին, ասել է, որ Ռուսաստանի նախագահ Վլադիմիր Պուտինի նկատմամբ իր համբերությունը սպառվում է, գրում է BBC-ի ռուսական ծառայությունը։
«Իմ համբերությունը Պուտինի նկատմամբ արագորեն սպառվում է», – ասել է Թրամփը։ Նա բացատրել է, որ հիասթափված է Ուկրաինայում հակամարտության կարգավորման առաջընթացի դանդաղությունից և սպառնացել է Մոսկվային նավթի և բանկային ոլորտների նոր սահմանափակումներով, ինչպես նաև մաքսատուրքերի սահմանմամբ։
Ավելի վաղ Թրամփը նշել էր, որ սեպտեմբերի 10-ին Լեհաստան երկու տասնյակ ռուսական անօդաչու թռչող սարքերի ներթափանցումը «կարող է սխալմունք լինել»։
«Ոչ, դա սխալմունք չէր», – ուրբաթ առավոտյան պատասխանել է նրան Լեհաստանի արտաքին գործերի նախարար Ռադոսլավ Սիկորսկին։
«Ես ոչ մեկին չեմ պատրաստվում պաշտպանել», – ավելի ուշ շարունակել է Թրամփը իր հեռակա բանավեճը եվրոպացի առաջնորդների հետ, որոնք միաձայն դատապարտել էին անօդաչու թռչող սարքերի ներխուժումը Լեհաստան։ «Նրանք (անօդաչու թռչող սարքերը)միևնույն է չպետք է այնտեղ լինեին»-ասել է նա։
«Մենք նույնպես կցանկանայինք, որ Լեհաստանի վրա անօդաչու թռչող սարքերի հարձակումը սխալմունք լիներ: Բայց դա այդպես չէ: Եվ մենք դա գիտենք», – իր հերթին գրել է Լեհաստանի վարչապետ Դոնալդ Տուսկը X սոցիալական ցանցում։
Թարգմանությունը՝ Էմմա Չոբանյանի
