Թուրք հաքերները հրապարակել են իսրայելցի պաշտոնյաների հեռախոսահամարները, զանգահարել ՊՆ ղեկավարին

Թուրք հաքերները X սոցիալական ցանցում հրապարակել են  Իսրայելի խորրդարանի՝ Քնեսեթի խոսնակ Ամիր Օհանայի և նախարարների, այդ թվում՝ Յարիվ Լևինի, Էլի Քոհենի, Դուդի Ամսալեմի, Յոավ Քիշի, Միրի Ռեգևի, Միկի Զոհարի, Ավի Դիխտերի և Նիր Բարկատի, նաև  պաշտպանության նախկին նախարար Յոավ Գալանտի հեռախոսահամարը։ Այս մասին հայտնում է իսրայելական Ynet-ը։

Հաքերները նաև հրապարակել են Իսրայելի վարչապետ Բենիամին Նեթանյահուին ենթադրաբար պատկանող համարը, սակայն նշել են, որ այն կարող է թարմացված չլինել:

Երեկ երեկոյան թուրքական հաքերային խումբը հրապարակել էր Իսրայելի  պաշտպանության նախարար Իսրայել Կացի բջջային հեռախոսահամարը և մի սքրինշոթ, որը նրանք արել են սխալմամբ տեսազանգին պատասխանած նախարարից։

Զանգի ընթացքում հաքերը վիրավորանքներ էր հնչեցրել Իսրայելի պաշտպանության նախարարի հասցեին և նրա դեմքի սքրինշոթն արել, նախքան Կացը կհասցներ անջատել զանգը։ Թուրքական խումբը հետագայում հրապարակել է նկարը, նաև WhatApp-ով Կացին ուղարկված մի շարք հաղորդագրությունների սքրինշոթեր։

Առաջին հաղորդագրության մեջ ասվում է. «Հե՛յ, Կաց, երբեք մի մոռացիր սա, քո մահը մոտ է, մենք Քասամի պաշտպաններն ենք, մենք քեզ և քո երկիրը կթաղենք պատմության մեջ»՝ նկատի ունենալով ՀԱՄԱՍ-ի զինված թևը։

Հաջորդ երկու հաղորդագրությունների մեջ ասվում է. «Ի՞նչ դժոխք է պատահել» և «Շուն, արգելափակե՞լ ես ինձ»։

Վերջին հաղորդագրության կողքին կա միայն մեկ նշան, որը ցույց է տալիս, որ Կացը արգելափակել է համարը։

Հաղորդվում է, որ համարի հրապարակումից հետո Կացը ստացել է ևս «հազարավոր» թշնամական հաղորդագրություններ, որոնցից մի քանիսը ավտոմատացված են եղել։ Սպառնալիքներից մեկում ասվում էր. «Մենք կսպանենք ձեզ»։

Հիշեցնենք, 69-ամյա Կացը Իսրայելի պաշտպանության նախարարն է 2024 թվականի նոյեմբերից։

Թարգմանությունը՝ Էմմա Չոբանյանի