Չենք վախենում Փաշինյանի թափահարած մուրճից, վախենում ենք Սյունիքը կորցնելուց, բախման հարթակ դառնալուց. Արտակ Զաքարյան․ ՏԵՍԱՆՅՈՒԹ

ՀՀԿ ԳՄ անդամ, պաշտպանության նախկին փոխնախարար Արտակ Զաքարյանը Factor TV-ի հետ զրույցում մեղադրում է ՀՀ իշխանությանը՝ պատերազմներ բերելու մեջ, հակադարձելով ԱԺ ընդդիմությանն ուղղվող այն մեղադրանքներին, որ ընդդիմությունը «պատերազմի կուսակցություն» է։ Ըստ Զաքարյանի՝ Հայաստանը պատերազմի մեջ է հայտնվել հենց գործող ուժի պատճառով․ «Պատերազմի կուսակցությունը յոթ տարի իշխում է Հայաստանում։ Երեք-չորս պատերազմ ենք ունեցել, բոլորը՝ կորուստներով»։
Զաքարյանը պնդել է, որ իրավիճակի տերը Ադրբեջանն է․ «Սա երևում է օգոստոսի 8-ի փաստաթղթից։ Եթե այն կատարվի, Հայաստանը կախված կլինի Բաքվից»։

Նա քննադատել է իշխանության հայտարարությունները՝ կապված ապաշրջափակման հարցի հետ։ Ընդդիմադիր գործիչը չի հավատում իշխանության հավաստիացմանը, որ ապարջափակմամբ ՀՀ ինքնիշխանությունը հարգվելու է․ «ՔՊ-ն ճոռոմ-ճոռոմ խոսում է։ Քաղաքական շուկա են բերել Նախիջևանը Ադրբեջանին կապող միջանցքը, որը թուրքական աշխարհն է հսկելու։ Այն գործարկվելու է Հայաստանի նվազագույն ներգրավմամբ։ Եթե մենք ունենանք լիարժեք որոշում կայացնելու իրավունք և կարողանանք արգելել մեր տարածքով բեռների անցումը, այդ դեպքում կասեի՝ այո, ինքնիշխանությունը պահպանվում է»։

Զաքարյանը կասկածի տակ է առնում խաղաղության հաստատման մասին իշխանության պնդումը․ «Ինչո՞ւ ՔՊ-ն չի ասում՝ հարգելի՛ Դոնալդ Թրամփ, մենք միջանցքից չենք խոսել։ Իշխանությունը խաբում է ժողովրդին, որ խաղաղություն է բերել։ ԱՄՆ-ին կասենք՝ սա մեզ պարտադրված թուղթ է։ Պետք է նորից բանակցենք օգոստոսի 8-ին նախաստորագրված փաստաթուղթը։ Եթե խաղաղության ենք գնում, ինչո՞ւ Ադրբեջանը Հայաստանի օկուպացված տարածքից դուրս չի գալիս, գերիներին չի վերադարձնում»։
Նրա խոսքով՝ իշխանությունն ուզում է փոխել Սահմանադրությունը Ադրբեջանի պահանջով․ «Մենք խանգարելու ենք Փաշինյանին այդ հարցում։ Հայաստանի տակ ական են դնում»։

Այդուհանդերձ, Զաքարյանը շեշտել է, որ ՀՀԿ-ի նպատակը իշխանության գալը չէ․ «Մեր նպատակը իշխանափոխությունն է։ Գործող իշխանությունն է բոլոր դժբախտությունների պատճառը։ Մենք չենք վախենում Փաշինյանի թափահարած մուրճից։ Մենք վախենում ենք Սյունիքը կորցնելուց և բախումների հարթակ դառնալուց»։

Հարցազրույցն ամբողջությամբ՝ տեսանյութում։

Ռոբերտ Անանյան