Բաքուն ու Վատիկանը համագործակցության նոր հուշագիր են ստորագրել

Վատիկանն  ու Ադրբեջանը համագործակցության նոր հուշագիր են ստորագրել։ Հուշագիր  ստորագրվել է մի կողմից Ադրբեջանի «Հեյդար Ալիև» hիմնադրամի  և Ադրբեջանի գիտությունների ազգային ակադեմիայի, իսկ մյուս կողմից՝ Վատիկանի առաքելական գրադարանի և առաքելական արխիվի միջև։

Ադրբեջանական լրատվամիջոցների հաղորդմամբ՝ ստորագրման արարողությունը տեղի է ունեցել Սուրբ Աթոռում, և փաստաթուղթը ստորագրել են Ադրբեջանի  նախագահի օգնական, «Հեյդար Ալիև» հիմնադրամի գործադիր տնօրեն Անար Ալեքբերովը և Առաքելական գրադարանի և առաքելական արխիվի ղեկավար արքեպիսկոպոս Ջովաննի Չեզարե Պագացին։

Նշվում է, որ հուշագրի նպատակն է աջակցել գիտության և հետազոտությունների ոլորտում անմիջական համագործակցությանը և փորձի փոխանակմանը, ինչպես նաև ապահովել Վատիկանի արխիվներում պահվող Ադրբեջանի պատմության վերաբերյալ փաստաթղթերի ուսումնասիրությունը, պահպանումը և թվայնացումը։

Հավելենք, որ 2024թ-ի սեպտեմբերին էլ Վատիկանի և Ադրբեջանի «Հեյդար Ալիև» hիմնադրամի միջև պայմանագիր էր ստորագրվել Սուրբ Պողոսի տաճարի վերականգնման աշխատանքներ իրականացնելու մասին։

Ի դեպ,  Վատիկանն ու «Հեյդար Ալիև» հիմնադրամը համագործակցում են վաղուց, որն անդրադառնում է նաև Սուրբ Աթոռի դիրքորոշման վրա Ադրբեջանի հետ կապված տարբեր հարցերում։

Ադրբեջանական հիմնադրամի աջակցությամբ Վատիկանում վերականգնվել են բազմաթիվ պատմական հուշարձաններ, խորաքանդակներ ու դամբարաններ։ Դրանց թվում են Սուրբ Մարչելինոյի և Պիետրոյի դամբարանները, որոնք հանրության համար բացվել են 2016 թվականին, նույն թվականին սկսվել են նաև Սուրբ Սեբաստիան տաճարի դամբարանների վերականգնման աշխատանքները։ 2018 թվականի սեպտեմբերին «Հեյդար Ալիև» հիմնադրամի նախագահ, Ադրբեջանի առաջին տիկին ու առաջին փոխնախագահ Մեհրիբան Ալիևան անձամբ է մասնակցել դրանց բացման արարողությանը։

Ադրբեջանի նախագահ Իլհամ Ալիևն ու նրա կինը վերջին անգամ այցով Վատիկանում էին 2020 թվականի փետրվարին։ Նրանց ընդունել էր Հռոմի Ֆրանցիսկոս պապը։ Մեհրիբան Ալիևան պարգևատրվել էր Պիոս պապի ասպետական ուխտի Մեծ խաչ շքանշանով։

Էմմա Չոբանյանի