Քաղաքականություն
08.09.2025 | 16:46
Ադրբեջանի արտաքին գործերի նախարար Ջեյհուն Բայրամովը Բաքվում ընդունել է ԱՄՆ Միջին միջանցքի հարցով հավաստագրված առևտրային առաքելության ներկայացուցիչներին։
Ադրբեջանական լրատվամիջոցների հաղորդմամբ՝ հանդիպման ընթացքում նշվել է այս տարվա օգոստոսի 8-ին Վաշինգտոնում Ադրբեջանի և ԱՄՆ նախագահների, ինչպես նաև՝ Հայաստանի վարչապետ Նիկոլ Փաշինյանի մասնակցությամբ կայացած քննարկումների և ստորագրված փաստաթղթերի «պատմական նշանակությունը»։
Ընդգծվել է, որ այդ համաձայնագրերը նպաստում են տարածաշրջանային խաղաղությանը և առաջընթացին, ինչպես նաև լայն հեռանկարներ են բացում ադրբեջանա-ամերիկյան հարաբերությունների զարգացման համար։ Այս համատեքստում ուշադրություն է հրավիրվել նախագծի կարևորության վրա, որը կապահովի Ադրբեջանի արևմտյան շրջանների և Նախիջևանի Ինքնավար Հանրապետության միջև անխոչընդոտ կապը։
Տեղեկատվություն է տրամադրվել Ադրբեջանի կողմից Միջին միջանցքի վերականգնման և ակտիվացմանն ուղղված երկարաժամկետ ջանքերի վերաբերյալ՝ ընդգծելով, որ այդ ջանքերն իրականացվում են այնպիսի կոնկրետ նախագծերի միջոցով, ինչպիսիք են Բաքու-Թբիլիսի-Կարս երկաթուղին, Բաքվի միջազգային ծովային առևտրի նավահանգիստը և Ալաթի ազատ տնտեսական գոտին։
Գոհունակությամբ նշվել է Ադրբեջանի և Կասպից ծովի արևելյան ափին գտնվող գործընկեր պետությունների, այդ թվում՝ Կենտրոնական Ասիայի «բարեկամ և եղբայրական երկրների միջև ռազմավարական կապերի առկայությունը»։ Հանդիպման ընթացքում նաև ընդգծվել է, որ Ադրբեջանը տարիներ շարունակ կարևոր դեր է խաղացել Եվրոպայի էներգետիկ անվտանգության ապահովման գործում, և նշվել, որ այսօր Ադրբեջանից բնական գազ ստացող երկրների թիվը հասել է 14-ի։
Նաև տեղեկատվություն է տրամադրվել Ադրբեջանի կողմից գործընկեր երկրների հետ համատեղ իրականացվող լայնածավալ աշխատանքներին՝ վերականգնվող էներգիայի ռեսուրսների զարգացման և դրանք Եվրոպա փոխանցելու ուղղությամբ։ Մասնավորապես, ուշադրություն է դարձվել կոնկրետ նախագծերի կարևորությանը, ինչպիսին է Սևծովյան էներգետիկ ստորջրյա մալուխի կառուցումը։
Ադրբեջանական աղբյուրները հաղորդում են, որ ամերիկյան պատվիրակությունն այսօր հանդիպումներ կունենա նաև «Ադրբեջանի երկաթուղիներ» ՓԲԸ-ի նախագահ Ռովշան Ռուստամովի, էկոնոմիկայի նախարար Միքայիլ Ջաբարովի և թվային զարգացման և տրանսպորտի նախարար Ռաշադ Նաբիևի հետ։ Վաղվա օրակարգում են հանդիպումը Ադրբեջանի Կասպյան նավագնացության ընկերությունում և բանակցությունները Պետական մաքսային կոմիտեի նախագահ Շահին Բաղիրովի հետ։
Ադրբեջանից հետո ԱՄՆ պատվիրակությունը մեկնելու է Վրաստան։
Թարգմանությունը՝ Էմմա Չոբանյանի
