Ադրբեջանում վախի մթնոլորտ է, հայերի հետ ընկերություն անելը խնդրահարույց է, ՀՀ-ում վախ չկա՝ ԱԱԾ-ն չի այցելի․ Մարգարիտա Թադևոսյան. ՏԵՍԱՆՅՈՒԹ

ԱՄՆ Ջորջ Մեյսոն համալսարանի դասախոս, Խաղաղաշինության պրակտիկայի կենտրոնի գործադիր տնօրեն, դոկտոր Մարգարիտա Թադևոսյանը Factor TV-ի հետ զրույցում ասում է, որ Վաշինգտոնում Խաղաղության համաձայնագրի նախաստորագրումը կարևոր և առաջին քայլ է՝ ՀՀ-ի և Ադրբեջանի միջև խաղաղության հաստատման ուղղությամբ․

«Սակայն սխալ է ասել՝ կոնֆլիկտն ավարտված է, հաստատվեց խաղաղություն։ Կոնֆլիկտը փոխակերպվել է և 30 տարվա փուլն այլևս գոյություն չունի, նոր փուլում նոր մոտեցումներ են անհրաժեշտ, սակայն թղթի վրա գրված բանաձևերը վերջնականապես չեն բերի խաղաղության։ Ադրբեջանում վախի մթնոլորտ է, հայերի հետ ընկերություն անելը խնդրահարույց է, ՀՀ-ում ԱԱԾ-ն չի այցելի մարդուն, վախ չկա։ Մինչդեռ, Ալիևը բանտարկել է ՀՀ-ի հետ խաղաղության կողմնակից ակտիվիստներին, ինչն ազդակ է, որ խաղաղությունից չի կարելի խոսել, ավտորիտար ռեժիմ է, անձնական կյանքի իլյուզիաներ չկան»,- ասաց Մարգարիտա Թադևոսյանը։

Ըստ Թադևոսյանի՝ ԱՄՆ-ն վերադարձավ մեր ռեգիոն ՀՀ դեսպանի քրտնաջան ջանքերի արդյունքում, և ՀՀ-ի նոր դեսպանի խնդիր պետք է լինի ԱՄՆ-ին ներգրավված պահել կոնֆլիկտի լուծման հարցում․ «Պետք չէ ակնկալել, որ ՀՀ-ն և Ադրբեջանը կլինեն բարեկամ երկրներ, բոլոր խնդիրները կլուծվեն։ Պետք է գիտակցել, որ խաղաղությունը դանդաղ պրոցես է։ Ես մտահոգված եմ, հաղթողի պարտադրած խաղաղություն ենք տեսնում ՀՀ-Ադրբեջան տիրույթում․ սա բացասական հետևանք կունենա, սա խնդրահարույց է տևական խաղաղության կոնտեքստում»,- ասում է կոնֆլիկտաբանը։

Հարցազրույցն ամբողջությամբ՝ տեսանյութում։

Ռոբերտ Անանյան