Այսօրվանից վարորդական վկայականի քննությունները հնարավոր կլինի վերահանձնել արագացված ընթացակարգով․ ի՞նչ պետք է իմանալ

Այսօրվանից վարորդական վկայականի համար քննությունների վերահանձնման գործընթացում փոփոխություններ են նախատեսվում։ Քաղաքացիները հնարավորություն ունեն վարորդական իրավունքի վկայական ստանալու քննությունն առաջին անգամ բացասական ստանալուց հետո վերահանձնել հաջորդ օրը՝ հավելյալ վճարի դիմաց, առցանց գրանցմամբ։

Factor.am-ի խմբագրություն զանգահարած քաղաքացին, սակայն, նշեց, որ համակարգի գործարկման առաջին օրն իսկ roadpolice.am կայքում քննությունը վերահանձնելու համար գրանցման հետ կապված խնդիրներ կան։

«Ահավոր հերթեր են, համակարգը նորմալ չի աշխատում, ասում է՝ գրանցված չեք, իրավունք չունեք մասնակցելու»,- ասաց մեր զրուցակիցը։

Քաղաքացու խոսքով՝ վարորդական վկայական ստանալու տեսական քննությունից երրորդ անգամ է կտրվել՝ մեկ միավոր ցածր ստանալու պատճառով և ցանկացել է հաջորդ օրը կրկին քննություն հանձնել։

Ֆեյսբուքյան օգտատերերն էլ հարց են բարձրացնում, որ եթե ծրագրով մոտակա օր չկա և ստիպված են մի քանի ամիս սպասել իրենց հերթին, ինչպե՞ս է ստացվում, որ վճարելու դեպքում օր է բացվում։

ՆԳՆ ոստիկանությունից հայտնում են՝ առաջին անգամ բացասական ստանալու դեպքում անձը կարող է արտահերթ մասնակցել քննությանը՝ 

• հաջորդ օրը՝ 45․000 ՀՀ դրամ վճարի դիմաց, 
• երրորդ օրը՝ 30․000 ՀՀ դրամ վճարի դիմաց:

Եթե անձը բացասական է ստանում երկրորդ կամ յուրաքանչյուր հաջորդ անգամ, նախկին 30-օրյա ժամկետի փոխարեն՝ արագացված ծառայությունների միջոցով հնարավորություն ունի օգտվել հետևյալ նոր ժամկետներում՝

• յոթերորդ օրը՝ 45․000 ՀՀ դրամ վճարի դիմաց, 
• տասնչորսերորդ օրը՝ 30․000 ՀՀ դրամ վճարի դիմաց: 

Մեկ այլ կարգավորմամբ՝ կրկին սեպտեմբերի 1-ից տրանսպորտային միջոցի պետական գրանցումն ու հաշվառումն իրականացնելիս հնարավոր կլինի հաշվառման վկայագիրը ստանալ փոստային առաքման եղանակով։ 

Անի Թամրազյան