Քաղաքականություն
01.09.2025 | 16:55
ԵԱՀԿ գործող նախագահ, Ֆինլանդիայի արտաքին գործերի նախարար Էլինա Վալտոնենը և ԵԱՀԿ գլխավոր քարտուղար Ֆերիդուն Հ.Շինիրլիօղլուն ողջունում են Նախարարների խորհրդի որոշման ընդունումը, որը փակում է Մինսկի գործընթացը և դրան առնչվող կառույցները՝ Հայաստանի և Ադրբեջանի համատեղ դիմումից հետո։
«Ես կցանկանայի ևս մեկ անգամ իմ ջերմագին շնորհավորանքները հղել Հայաստանին և Ադրբեջանին խաղաղության և հարաբերությունների կարգավորման վերաբերյալ նրանց պատմական համաձայնագրերի և դրանց արագ իրականացումը սկսելու վճռական որոշման կապակցությամբ։ Ես անմիջապես արձագանքել եմ նրանց համատեղ կոչին և ցանկանում եմ իմ անկեղծ երախտագիտությունը հայտնել կողմերին գործընթացում իրենց գերազանց համագործակցության համար։ Ես նաև կցանկանայի գովաբանել մասնակից պետություններին այս համաձայնության հասնելու գործում ցուցաբերած համագործակցային ոգու համար»,- ասել է Վալտոնենը։
Նախարարական խորհրդի այս որոշումը հետևում է օգոստոսի 8-ին Վաշինգտոնում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի կողմից ստորագրված համատեղ հռչակագրին, որին ներկա էր նաև ԱՄՆ նախագահ Դոնալդ Թրամփը։ Նախարարական խորհրդի որոշումն ընդունվել է ԵԱՀԿ բոլոր 57 մասնակից պետությունների կոնսենսուսով։
«Սա պատմական զարգացում է, որն ընդգծում է, թե ինչի կարող է հասնել դիվանագիտությունը նույնիսկ տասնամյակներ տևած հակամարտությունից և անվստահությունից հետո։ Այն ցույց է տալիս, որ համաձայնությունը հնարավոր է մնում, երբ կողմերի միջև կա ընդհանուր լեզու գտնելու վճռականություն»,- ասել է գլխավոր քարտուղար Շինիրլիօղլուն։
ԵԱՀԿ գործող նախագահը և ԵԱՀԿ գլխավոր քարտուղարը վերահաստատել են իրենց անսասան հանձնառությունը՝ աջակցելու այն ջանքերին, որոնք երկարատև խաղաղություն և կայունություն են բերում Հայաստանում, Ադրբեջանում և ավելի լայն տարածաշրջանում։
Նշվում է, որ այս որոշման ընդունումից հետո ԵԱՀԿ-ն քայլեր կձեռնարկի Մինսկի գործընթացի և դրա հետ կապված կառույցների փակման համար։ Միայն վարչական գործառույթները, ինչպիսիք են ակտիվների և սարքավորումների հանձնումը, կշարունակվեն մինչև գործընթացի ավարտը՝ ոչ ուշ, քան 2025 թվականի դեկտեմբերի 1-ը։
Հիշեցնենք՝ ավելի վաղ Ադրբեջանի ԱԳՆ-ն հայտնել էր, որ ԵԱՀԿ Մշտական խորհուրդը Մինսկի գործընթացը և դրան կից կառույցների գործունեությունը դադարեցնելու որոշում է ընդունել։
Թարգմանությունը՝ Էմմա Չոբանյանի
