20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Բաքուն հայտնում է, որ ԵԱՀԿ Մշտական խորհուրդը Մինսկի գործընթացը և դրան կից կառույցների գործունեությունը դադարեցնելու որոշում է ընդունել
Քաղաքականություն
01.09.2025 | 15:11
2025 թվականի սեպտեմբերի 1-ին ԵԱՀԿ Մշտական խորհուրդը որոշում է կայացրել դադարեցնել ԵԱՀԿ Մինսկի գործընթացը և դրան առնչվող կառույցների գործունեությունը։ Այս մասին հայտարարել է Ադրբեջանի ԱԳՆ-ն։
Որոշման համաձայն, որը հիմնված է Ադրբեջանի Հանրապետության և Հայաստանի Հանրապետության արտաքին գործերի նախարարների համատեղ նամակի վրա, որը ուղղված էր ԵԱՀԿ գործող նախագահին 2025 թվականի օգոստոսի 8-ին Վաշինգտոնում կայացած Ադրբեջանի նախագահի և Հայաստանի վարչապետի հանդիպման շրջանակներում՝ ԱՄՆ նախագահի մասնակցությամբ, 2025 թվականի սեպտեմբերի 1-ից դադարեցվում են ԵԱՀԿ Մինսկի գործընթացի, ԵԱՀԿ գործող նախագահի անձնական ներկայացուցչի՝ Մինսկի համաժողովի շրջանակներում քննարկվող հակամարտության վերաբերյալ, ինչպես նաև Բարձր մակարդակի պլանավորման խմբի գործունեությունը, հաղորդում է ադրբեջանական գերատեսչությունը։
ԵԱՀԿ քարտուղարությանը հանձնարարվել է ավարտել նշված կառույցների փակման հետ կապված բոլոր կազմակերպչական և տեխնիկական հարցերը ոչ ուշ, քան 2025 թվականի դեկտեմբերի 1-ը։
Նշվում է, որ որոշմամբ նաև ուժը կորցրած և անվավեր են ճանաչվում ԵԱՀԿ շրջանակում հայ-ադրբեջանական հակամարտությանը վերաբերող նախկինում ընդունված բոլոր փաստաթղթերը։
Այսպիսով, հակամարտության կարգավորման նպատակով նախկինում ստեղծված բոլոր ինստիտուտները ճանաչվում են որպես արդիականությունը կորցրած՝ հակամարտության կարգավորումից հետո ստեղծված նոր իրավիճակի պատճառով, և դրանք փակելու որոշումն ընդունվել է ԵԱՀԿ բոլոր մասնակից պետությունների կողմից, և ինստիտուտները պաշտոնապես փակվել են։
«Այս որոշման ընդունումը վկայում է նախկինում օկուպացված տարածքների նկատմամբ Ադրբեջանի Հանրապետության ինքնիշխան վերահսկողության և տարածքային ամբողջականության վերականգնման միջազգային ճանաչման և հայ-ադրբեջանական հակամարտության ավարտի, ինչպես նաև 2025 թվականի օգոստոսի 8-ին Վաշինգտոնում կայացած հանդիպման ժամանակ ձեռք բերված պայմանավորվածությունների գործնական իրականացման մասին՝ Ադրբեջանի և Հայաստանի միջև հարաբերությունների կարգավորման գործընթացի շրջանակում»,- ասվում է Ադրբեջանի ԱԳՆ-ի հայտարարությունում։
Նշվում է, թե Ադրբեջանը կշարունակի «հետևողականորեն պաշտպանել իր սկզբունքային դիրքորոշումը՝ հիմնված միջազգային իրավունքի վրա՝ տարածաշրջանում խաղաղության և կայունության ամրապնդման նպատակով»։
Թարգմանությունը՝ Էմմա Չոբանյանի
