17.02.2026 | 01:59
Կարինա Ակոպովան ու Նիկիտա Ռախմանինը 14-րդ տեղը գրավեցին ձմեռային Օլիմպիական խաղերում
Ուրսուլա ֆոն դեր Լեյենի ինքնաթիռի GPS-ը Բուլղարիայի օդային տարածքում չի գործել․ FT
Քաղաքականություն
01.09.2025 | 17:12
Եվրահանձնաժողովի նախագահ Ուրսուլա ֆոն դեր Լեյենին Բուլղարիայի Պլովդիվ քաղաք տեղափոխող ինքնաթիռը չի կարողացել օդանավակայանին մոտենալիս օգտագործել էլեկտրոնային նավիգացիոն սարքերը: Այս մասին հաղորդում է Financial Times-ը՝ հղում անելով երեք անանուն պաշտոնյաների, գրում է BBC-ի ռուսական ծառայությունը։
«GPS ազդանշանը կորել է օդանավակայանում»,- ասել է լրատվամիջոցի աղբյուրներից մեկը։
Նրա խոսքով՝ ինքնաթիռը մեկ ժամ պտույտներ է գործել օդանավակայանի շուրջ, ապա օդաչուն որոշել է թղթային քարտեզներ օգտագործել վայրէջքի համար։
«Դա, անկասկած, միջամտություն էր»,- ասել է FT-ի աղբյուրը։
Բուլղարիայի օդային երթևեկության կառավարման ծառայությունը հաստատել է միջադեպի մասին տեղեկությունը։
«2022 թվականի փետրվարից ի վեր մենք նկատում ենք GPS ազդանշանի խափանման դեպքերի նկատելի աճ, իսկ վերջերս՝ նաև ազդանշանի կեղծման»,- նշել են ծառայությունից։
Ըստ FT-ի՝ վերջին տարիներին Բալթիկ ծովում և Ռուսաստանին սահմանակից եվրոպական երկրներում GPS ազդանշանների խլացման դեպքերն ավելի հաճախակիացել են։
Կրեմլը և Եվրահանձնաժողովը լրատվամիջոցին չեն մեկնաբանել միջադեպը։ Սակայն Եվրոպական հանձնաժողովի մամուլի ծառայությունը Politico-ին հաստատել է GPS-ի հետ կապված միջադեպը՝ հավելելով, որ ինքնաթիռն անվտանգ վայրէջք է կատարել։
Եվրահանձնաժողովի խոսնակի տեղակալ Արիաննա Պոդեստան, իր հերթին, հայտնել է, որ Բուլղարիայի իշխանությունները «կասկածում են, որ այդ ակնհայտ միջամտությունը կատարվել է Ռուսաստանի կողմից»։
Թարգմանությունը՝ Էմմա Չոբանյանի
