Վրաստանի նախագահը Թրամփին բաց նամակ է հղել՝ դժգոհելով, որ նպաստել է ՀՀ-Ադրբեջան համաձայնագրի ստորագրմանը, սակայն ոչինչ չի անում Վրաստանի մասով

Վրաստանի նախագահ Միխեիլ Ղավելաշվիլին, որի լեգիտիմությունը չեն ճանաչում ընդդիմությունը և հասարակության մի մասը, բաց նամակ է հղել ԱՄՆ նախագահ Դոնալդ Թրամփին, փոխանցում է Эхо Кавказа-ն։

Նամակում խոսվում է «Խորքային պետության» (Deep State) մասին, որին իշխող «Վրացական երազանք»-ը վաղուց մեղադրում է Վրաստանին պատերազմի մեջ ներքաշելու և Արևմուտքի հետ նրա հարաբերությունները վատթարացնելու փորձերի, ԱՄՆ ներկայիս վարչակազմի կողմից Վրաստանի նկատմամբ անբավարար ուշադրության մասին, ինչը «զարմանք է առաջացնում վրացական հասարակության մեջ», ինչպես նաև երկրների միջև ռազմավարական գործընկերությունը վերականգնելու անհրաժեշտության մասին։

Նշվում է, որ Ղավելաշվիլին իր խորին հարգանքն է հայտնել Դոնալդ Թրամփի նկատմամբ և հույս, որ նրա նախագահությունը «կհզորացնի Միացյալ Նահանգները և կբերի ավելի մեծ բարգավաճում ամերիկյան ժողովրդին, ինչպես նաև ավելի մեծ խաղաղություն, հանգստություն և բարգավաճում ամբողջ աշխարհին»։

Այնուհետև Միխեիլ Ղավելաշվիլին ամերիկյան առաջնորդին հիշեցրել է, որ ԱՄՆ-Վրաստան «ռազմավարական գործընկերությունը չեղարկվել է Բայդենի վարչակազմի կողմից» Թրամփի ԱՄՆ նախագահ ընտրվելուց հետո մի քանի շաբաթ անց՝ նրա երդմնակալությունից առաջ, «որպես անարդար, կոպիտ և ագրեսիվ քաղաքականության մաս, որը նա վարել է բազմաթիվ ինքնիշխան պետությունների նկատմամբ»։

Նա նաև գրել է, որ իր նախագահության մի քանի ամիսների ընթացքում Դոնալդ Թրամփը սերտ հարաբերություններ է հաստատել Վրաստանի բոլոր հարևան երկրների հետ, «հաջողությամբ նպաստել է Ադրբեջանի և Հայաստանի միջև խաղաղության համաձայնագրի ստորագրմանը, ակտիվորեն համագործակցում է Թուրքիայի իշխանությունների հետ և նույնիսկ վերականգնել գործընկերային հարաբերությունները ՌԴ նախագահ Վլադիմիր Պուտինի հետ, սակայն այս ֆոնին նա ոչինչ չի ասել Վրաստանի մասին»։

Նամակն ավարտվում է՝ հույսով, որ ԱՄՆ վարչակազմի վերաբերմունքը Վրաստանի նկատմամբ կփոխվի։

«Կարևոր է, որ վրաց ժողովրդի ընկալման մեջ Միացյալ Նահանգները կապված լինի ոչ թե «Խորքային պետության», այլ ուժեղ ամերիկացի նախագահի հետ, ոչ թե խաղաղությունը խաթարելու և իրավիճակն անկայունացնելու մշտական ​​փորձերի, այլ խաղաղության և կայունության հետ, ոչ թե գենդերային և ԼԳԲՏ քարոզչության, այլ ավանդական արժեքների նկատմամբ հարգանքի հետ»,- գրել է Վրաստանի նախագահը։

Հիշեցնենք, որ ամիսներ առաջ էլ Դոնալդ Թրամփին բաց նամակ էր հղել Վրաստանի վարչապետ Իրակլի Կոբախիձեն՝ դժգոհելով, որ ԱՄՆ վարչակազմն անտեսում է Թբիլիսիին։

Թարգմանությունը՝ Էմմա Չոբանյանի