05.11.2026 | 14:42
Վիլեն Գաբրիելյանի ճեպազրույցը. ՈւՂԻՂ
Կիմ Չեն Ընը հանդիպել է Ուկրաինայի դեմ մարտերում զոհված զինվորների ընտանիքներին
Քաղաքականություն
31.08.2025 | 22:15
Ռուսաստանի կողմում կռվող և զոհված հյուսիսկորեացիների ճշգրիտ թիվը դեռևս անհայտ է, հայտնում է Euronews-ը։
Հյուսիսային Կորեայի առաջնորդ Կիմ Չեն Ընը հանդիպել է այն զինվորների ընտանիքներին, ովքեր զոհվել են Ուկրաինայի դեմ մարտերում։ Պետական լրատվամիջոցների հաղորդմամբ՝ Կիմը խորին ցավակցություն է հայտնել բոլոր հարազատներին․ «Մեր կուսակցությունն ու կառավարությունը կպատվեն բոլոր հերոսներին, որոնց հարգում է ամբողջ ազգը, և նրանց արժանի ծնողներին, ովքեր դաստիարակել են նրանց որպես պատվարժան մարդկանց։ Կուսակցությունն ու կառավարությունը նույնպես կանեն հնարավոր ամեն ինչ, որպեսզի ապահովեն ձեզ համար արժանապատիվ կյանք՝ առաջին հերթին, այն երկրում, որը պաշտպանվել է նահատակների կյանքի գնով»։
Անցած շաբաթ Կիմ Չեն Ընը Փհենյանում պետական պարգևներ է հանձնել այն զինվորներին ու սպայական կազմի անդամներին, որոնք ողջ են վերադարձել։
Ապրիլին Փհենյանը հաստատել էր իր զինծառայողների ուղարկումը Ռուսաստան՝ ընդունելով, որ կան նաև զոհեր, սակայն չհստակեցնելով նրանց թիվը։
Ավելի ուշ Ռուսաստանի նախագահ Վլադիմիր Պուտինը շնորհակալություն էր հայտնել Հյուսիսային Կորեային և խոստացել չմոռանալ հյուսիսկորեացի զինվորների զոհաբերությունը։
ԱՄՆ-ի, Հարավային Կորեայի և Ուկրաինայի գնահատականներով՝ անցած տարվա հոկտեմբերին Հյուսիսային Կորեան Ռուսաստան էր ուղարկել 10-12 հազար զինծառայող, իսկ այս տարվա սկզբին՝ ևս մոտ 3 հազար։
Զոհերի ճշգրիտ թիվը մնում է անորոշ։ Այս տարվա ապրիլին Հարավային Կորեայի հետախուզական ծառայությունը Հյուսիսային Կորեայի կորուստները գնահատել էր 4700 մարդ։
