06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Ֆրիդրիխ Մերց․ Ուկրաինայում պատերազմը դեռ երկար կտևի
Քաղաքականություն
31.08.2025 | 20:48
Ուկրաինայում պատերազմը կարող է շարունակվել դեռ երկար ժամանակ, հայտարարել է Գերմանիայի կանցլեր Ֆրիդրիխ Մերցը կիրակի՝ օգոստոսի 31-ին, ZDF հեռուստաալիքին տված հարցազրույցում։ Գերմանիայի կառավարության ղեկավարի խոսքով՝ պատերազմները ավարտվում են կամ «կողմերից մեկի ռազմական պարտությամբ», ինչին ներկայումս ոչ Մոսկվան, ոչ Կիևը մոտ չեն, կամ էլ «տնտեսական և/կամ ռազմական սպառմամբ», որը, ըստ Մերցի, այժմ ևս չի նկատվում։
Նա ընդգծել է, որ Եվրոպայի և ԱՄՆ-ի ջանքերն ուղղված են պատերազմը «հնարավորինս շուտ» ավարտելուն։ Սակայն, ըստ նրա, պատերազմի ամենաարագ ավարտը հնարավոր կլիներ միայն այն դեպքում, «եթե Ուկրաինան կապիտուլյացիայի ենթարկվեր, հանձնվեր և կորցներ իր անկախությունը», բայց դա «տարբերակ չէ», նշել է Գերմանիայի կանցլերը։ Նրա խոսքով՝ նման սցենարի դեպքում վտանգի տակ կհայտնվեր հաջորդ երկիրը, «իսկ մի քանի օր անց՝ մենք ինքներս», նախազգուշացրել է Մերցը։
Հարցին՝ արդյոք հնարավոր է կրակի դադարեցումից հետո արևմտյան ցամաքային զորքերի ուղարկումը Ուկրաինա, Ֆրիդրիխ Մերցը պատասխանել է, որ դա այժմ «դաշնակիցների հիմնական թեման չէ»։
«Առաջնահերթ խնդիրն է աջակցել ուկրաինական բանակին, որպեսզի նա երկարաժամկետ հեռանկարում կարողանա պաշտպանել իր երկիրը»,-ընդգծել է Մերցը։
«Ես ցանկանում եմ, որ Միացյալ Նահանգները որքան հնարավոր է երկար մեզ հետ փորձի լուծել այս խնդիրը»,-նշել է կանցլերը՝ հավելելով, որ դիվանագիտությունը երկար և ծանր գործընթաց է։ Նրա խոսքով՝ այնքան դիվանագիտական ջանքեր, որքան վերջին շաբաթներին՝ Ուկրաինայի պատերազմի խաղաղ կարգավորման ուղղությամբ, վերջին երեքուկես տարվա ընթացքում չեն եղել։ Ներկայումս խոսքը վերաբերում է «հաջորդ հանդիպման» նախապատրաստմանը, սակայն չի կարելի «սպասել, որ հիմա մեկ գիշերվա մեջ ամեն ինչ նորից լավանա», նշել է Գերմանիայի կառավարության ղեկավարը։
