13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Մահվան 17-րդ դեպքը բանտում․ «Արմավիր» ՔԿՀ-ում կալանավոր է մահացել
Հասարակություն
29.08.2025 | 12:53
«Արմավիր» քրեակատարողական հիմնարկում մահվան հերթական դեպքն է գրանցվել։ Քրեակատարողական ծառայությունից Factor TV-ին հայտնեցին, որ օգոստոսի 28-ին՝ ժամը 22։50-ին, ՀՀ արդարադատության նախարարության «Արմավիր» քրեակատարողական հիմնարկում պահվող կալանավորված անձ, 1962թ․ ծնված Ա․Վ․-ի ինքնազգացողության վատթարացման պատճառով կանչվել է շտապօգնություն։
«Ա․Վ-ն տեղափոխվել է քաղաքացիական բժշկական հաստատություն, որտեղ ժամը 23։58-ին արձանագրվել է նրա կենսաբանական մահը»,- մանրամասնեց Քրեակատարողական ծառայության հասարակայություն և լրատվության բաժնի պետ Նոնա Նավիկյանը։
Factor TV-ի տեղեկություններով՝ կալանավորն Արցախից բռնի տեղահանված Արտաշես Վարդանյանն է։ Փաստաբան Էրիկ Բեգլարյանը ֆեյսբուքյան գրառմամբ նշել է, որ իր պաշտպանյալն առողջական խնդիրներ է ունեցել, որոնք պատշաճ ուշադրության չեն արժանացել պատկան մարմինների կողմից։
«Արտաշես Վարդանյանը երկար ժամանակ բողոքում էր առողջական վիճակի վատթարացման մասին, սակայն, ցավոք, այդ բողոքները համապատասխան կերպով չէին արձագանքվում։ Չնայած բազմաթիվ բողոքներին՝ նրան չէին տեղափոխում հիվանդանոց կամ բժշկական մասնագիտացված հաստատություն՝ պատշաճ բժշկական օգնություն ստանալու նպատակով։ Բողոքների անտեսումը և համապատասխան արձագանքի բացակայությունը, ըստ ամենայնի, հանգեցրել են այն ողբերգական արդյունքին, որի մասին ստիպված եմ այսօր տեղեկացնել։ Հաշվի առնելով վերոգրյալը՝ խնդրում եմ Ձեր լիազորությունների շրջանակում ձեռնարկել բոլոր անհրաժեշտ միջոցները՝ ուղղակի և լիարժեք քննություն անցկացնելու Արտաշես Վարդանյանի մահվան պատճառների վերաբերյալ, պարզելու՝ արդյո՞ք քրեակատարողական հիմնարկի պատասխանատու աշխատակիցների կողմից եղել են անգործության դեպքեր, անփութություն կամ իրավական պարտականությունների չկատարում, և ամենակարևորը՝ տալ իրավական հստակ գնահատական նրանց գործողություններին կամ անգործությանը։ Կարծում եմ, որ այս դեպքի մանրամասն ուսումնասիրությունը և պատշաճ իրավական արձագանքը կարևոր նշանակություն ունեն ոչ միայն արդարության վերականգնման, այլև նմանատիպ դեպքերը կանխելու տեսանկյունից»,- գրել է Բեգլարյանը՝ դիմելով գլխավոր դատախազին և Մարդու իրավունքների պաշտպանին։
Նշենք, որ անցնող 8 ամիսների ընթացքում սա մահվան 17-րդ դեպքն է քրեակատարողական հիմնարկներում, որից 11-ի դեպքում գրանցվել է կենսաբանական մահ, 6-ը, նախնական տվյալներով, ինքնասպանություն է գործել։
Ռոզա Վարդանյան
