Ռուսական ԱԹՍ-ները Գերմանիայում հետախուզում են Ուկրաինա զենքի մատակարարման ուղիները. ԶԼՄ-ներ

Ռուսական անօդաչու թռչող սարքերը պարբերաբար հայտնվում են Արևելյան Գերմանիայի երկնքում, որտեղով անցնում են Ուկրաինա զենքի մատակարարման առանցքային երթուղիները։ Այս մասին գրում են The New York Times-ը և WirtschaftsWoche-ն՝ հղում անելով արևմտյան հետախուզական գործակալություններին, փոխանցում է The Insider-ը։

Հրապարակումների համաձայն՝ անօդաչու թռչող սարքերը գրանցել են ռազմական ավտոշարասյուների շարժը Թյուրինգիայում, այն տարածաշրջանում, որի միջոցով Իսպանիայից, Ֆրանսիայից և Բելգիայից բեռներ են ուղարկվում Լեհաստան, ապա՝ Ուկրաինա:

Արևմտյան հետախուզությունները նշում են, որ խոսքը մեկանգամյա  թռիչքների մասին չէ. ռուսական սարքերն ուղեկցում են գրեթե յուրաքանչյուր բեռ՝ հետևելով կանգառներին և շարասյուների շրջադարձերին: Այս կերպ Մոսկվան տեղեկատվություն է ստանում այն ​​մասին, թե ինչ տեսակի զենքեր են մատակարարվում Ուկրաինա և ինչ ժամանակում: Մասնագետները զգուշացնում են, որ այս տվյալները կարող են օգտագործվել ոչ միայն ռուսական զորքերին աջակցելու, այլև Եվրոպայում դիվերսիաների համար:

WirtschaftsWoche-ի տվյալներով՝ Մոսկվան օգտագործում է անօդաչու թռչող սարքերի լայն տեսականի՝ սպառողական մոդելներից մինչև Բալթիկ ծովում գտնվող նավերից արձակվող ծանր հետախուզական անօդաչու թռչող սարքեր։

Իրանական անօդաչու թռչող սարքերը, որոնք նախկինում օգտագործվել են միայն Ուկրաինայի դեմ պատերազմում, նկատվել են նաև Թյուրինգիայում։ Թիրախում են ոչ միայն մատակարարման ուղիները, այլև Բունդեսվերի բազաները, որտեղ մարզվում են ուկրաինական զորքերը, ինչպես նաև Գերմանիայում գտնվող ամերիկյան օբյեկտները, այդ թվում՝ Ռամշտայնը։

Գերմանական զինվորականները խոստովանում են, որ 2025 թվականին նման թռիչքների թիվն արդեն հարյուրներով է հաշվարկվում։ Միևնույն ժամանակ, Գերմանիայի՝ դրանց հակազդելու հնարավորությունները սահմանափակ են. չնայած Բունդեսվերը ստեղծել է անօդաչու թռչող սարքերի դեմ պայքարի աշխատանքային խումբ և գնում է անօդաչու թռչող սարքերի դեմ պայքարի համակարգեր, զորքերի ներկայացուցիչները խոստովանում են, որ երկիրը միայն մասամբ է պատրաստ հակազդելու սպառնալիքներին։

Ավելի վաղ հետախուզական ծառայությունները զգուշացրել էին Մոսկվայի ավելի արմատական ​​ծրագրերի մասին: Այսպիսով, արևմտյան հետախուզության տվյալներով՝ ռուս գործակալները մահափորձ էին նախապատրաստում Ուկրաինայի համար զենքի խոշորագույն արտադրողներից մեկի՝ «Ռայնմետալ» կոնցեռնի ղեկավար Արմին Պապերգերի դեմ։ Այս դրվագը, նշում են փորձագետները, ցույց է տալիս, որ Ռուսաստանի արշավը շատ ավելի հեռու է գնում դիտարկման շրջանակից և Գերմանիան վերածում է թաքնված պատերազմի հիմնական ճակատներից մեկի։

WirtschaftsWoche-ի տվյալներով՝ ռուսական հետախուզական ծառայությունները Գերմանիայում օգտագործում են, այսպես կոչված, միանգամյա օգտագործման գործակալներ։ ԱԴԾ-ն և Գլխավոր հետախուզական վարչությունը հենվում են ԳԴՀ դարաշրջանի հին ցանցերի վրա և գործակալներ են հավաքագրում մանր հանցագործների և Արևելյան Գերմանիայի ռուսամետ բնակիչների շրջանում։

Այս մարդկանց հավաքագրում են մեկանգամյա առաջադրանքների համար՝ փոքր անօդաչու թռչող սարքերի արձակումից մինչև հրկիզում և գրաֆիտի՝ խորհրդանշական պարգևի դիմաց։ Մասնագետները նշում են, որ այս գործողությունների նպատակը ոչ այնքան իրական վնաս պատճառելն է, որքան վախի մթնոլորտ ստեղծելը և գերմանական իշխանությունների խոցելիությունը ցույց տալը։

Թարգմանությունը՝ Էմմա Չոբանյանի