Կիևը պնդում է՝ ռուսական փոքր հրթիռային նավ է վնասել Ազովի ծովում․ Մոսկվան հայտարարում է ուկրաինական նավի խորտակման մասին

Ուկրաինայի պաշտպանության նախարարության գլխավոր հետախուզական վարչությունն օգոստոսի 28-ին հայտարարել է 21631 նախագծի ռուսական փոքր հրթիռային նավի՝ «Բույան-Մ»-ին հարված հասցնելու մասին։ Գործողությանը, ըստ տեղեկությունների, մասնակցել են Գլխավոր հետախուզական վարչության ակտիվ գործողությունների վարչության և «Պրիզրակի» հատուկ նշանակության ստորաբաժանման ներկայացուցիչները։

Նավը գտնվել է Ազովի ծովում՝ բռնակցված Ղրիմի մոտ։

«Ուկրաինայի պաշտպանության նախարարության գլխավոր հետախուզական վարչության «Պրիզրակի» հատուկ նշանակության ստորաբաժանման մատիկներն անօդաչու թռչող սարքի հարվածով վնասել են նավի ռադիոտեղորոշիչ կայանը, իսկ Ուկրաինայի պաշտպանության նախարարության գլխավոր հետախուզական վարչության ակտիվ գործողությունների վարչության հատուկ նշանակության ուժերը հարձակվել են «Կալիբրները» կրող նավատախտակի վրա»,- ասվում է Ուկրաինայի հետախուզական ծառայության հայտարարության մեջ։

Նշվում է, որ հարվածների հետևանքով նավը, որը Թեմրյուկի ծոցում գտնվող «Կալիբր» հրթիռների հնարավոր արձակման գոտում է եղել, վնասվել է և ստիպված է եղել լքել մարտական ​​հերթապահության գոտին։

Ռուսաստանի իշխանությունները դեռևս չեն մեկնաբանել այս տեղեկությունը։

Միաժամանակ, ՌԴ ՊՆ-ն հայտնում է, որ Ռուսաստանի ռազմածովային անօդաչու թռչող սարքը Դանուբի գետաբերանում խորտակել է ուկրաինական միջին հետախուզական «Սիմֆերոպոլ» նավը։

«Գերարագ անանձնակազմ նավակի միջոցով Ուկրաինայի ռազմածովային ուժերի «Սիմֆերոպոլ» միջին չափի հետախուզական նավը հարված է ստացել Դանուբ գետի գետաբերանում։ Հարձակման արդյունքում ուկրաինական նավը խորտակվել է»,- ասվում է հայտարարության մեջ։

Այս նավն առաջին անգամ գործարկվել է 2019 թվականի ապրիլի 23-ին։ Այն ծովում առաջին փորձարկումն անցել է 2020 թվականի հունվարի 30-ին, փորձարկումները տևել են շուրջ երկու տարի։ 2023 թվականի հուլիսին «Սիմֆերոպոլ»-ը զինվել է վեցփողանի  AK-306 զենքով։

Ուկրաինայի ռազմածովային ուժերի խոսնակ Դմիտրո Պլետենչուկը հաստատել է, որ Ռուսաստանը հարվածել է ուկրաինական ռազմանավին։

Պլետենչուկն «Ուկրինֆորմ» պետական ​​լրատվական գործակալությանը հայտնել է, որ հարվածի հետևանքով զոհվել է մեկ մարդ, վիրավորվել են մի քանիսը, «շարունակվում են մի քանի նավաստիների որոնումները»։

«Անձնակազմի մեծ մասն անվտանգ է»,- ասել է նա։

Թարգմանությունը՝ Էմմա Չոբանյանի