05.10.2026 | 21:37
Ազգերի լիգա. Հայաստանի հավաքականի մեկնարկային կազմը Չեռնոգորիայի դեմ խաղում
ԱՄՆ-ի կողմից Հնդկաստանի նկատմամբ սահմանված 50% մաքստուրքերն ուժի մեջ են մտել
Քաղաքականություն
27.08.2025 | 19:37
Հնդկաստանի կողմից ԱՄՆ արտահանվող ապրանքների համար սահմանված 50% մաքսատուրքերն ուժի մեջ են մտել օգոստոսի 27-ից։ AFP-ի հաղորդմամբ՝ սա ԱՄՆ նախագահ Դոնալդ Թրամփի կողմից երկրի առևտրային գործընկերների նկատմամբ սահմանված ամենաբարձր մաքսատուրքերից է, գրում է DW-ի ռուսական ծառայությունը։
Ինքը՝ Թրամփը, կոշտ միջոցների անհրաժեշտությունը բացատրում է Հնդկաստանին երկրորդական սահմանափակումների միջոցով պատժելու ցանկությամբ, քանի որ այն չի հրաժարվում ռուսական նավթի գնումներից՝ չնայած Ուկրաինայում շարունակվող պատերազմին։ Մոսկվան էներգետիկ ռեսուրսների վաճառքից ստացված եկամուտներն օգտագործում է, ի թիվս այլ բաների, հարևան պետության ներխուժումը ֆինանսավորելու համար։
Միաժամանակ, 50% բարձրացված մաքսատուրքը չի տարածվում Հնդկաստանից ԱՄՆ ներմուծվող բոլոր ապրանքների վրա: Բացառություններ են արվել, մասնավորապես, դեղագործական արտադրանքի և համակարգչային չիպերի համար: Ինչպես ավելի վաղ հայտարարել էր Թրամփը, ապագայում ԱՄՆ-ն առանձին տեսակի տուրքեր կներդնի այս կատեգորիաների ապրանքների համար։
Վերջին երեք շաբաթների ընթացքում Հնդկաստանից ԱՄՆ ներմուծման վրա արդեն իսկ գործում են 25% պատժիչ մաքսատուրքեր: Չինաստանից հետո Հնդկաստանը ռուսական նավթի ամենամեծ գնորդն է:
Ուկրաինայում 2022 թվականի փետրվարին պատերազմի սկսվելուց ի վեր, Հնդկաստանի գնումները այս ոլորտում աճել են 2%-ից մինչև 36%: Քննադատները կարծում են, որ որոշ արևմտյան երկրներ, որոնք պաշտոնապես աջակցում են հակապատերազմական պատժամիջոցներին, դեռևս գնում են ռուսական նավթ, սակայն Հնդկաստանի միջոցով:
Միաժամանակ, Հնդկաստանի վարչապետ Նարենդրա Մոդին ընդգծել է, որ ցանկանում է իր երկիրն ավելի անկախ դարձնել էներգամատակարարումների առումով:
Թարգմանությունը՝ Էմմա Չոբանյանի
