03.10.2026 | 22:08
Հայաստանի հավաքականը ժամանել է Պոդգորիցա
Հրաժարականներ Երևանի քաղաքապետարանում․ միաժամանակ մի քանի պաշտոնյա աշխատանքից ազատման դիմում է գրել
Քաղաքականություն
27.08.2025 | 17:35
Երևանի քաղաքապետարանի աշխատակազմի քարտուղար Շավարշ Գրիգորյանն աշխատանքից ազատման դիմում է ներկայացրել և, քաղաքապետի որոշմամբ, ազատվել է պաշտոնից։ Այդ պաշտոնում նշանակվել է նրա տեղակալներից Վիլեն Արևշատյանը։
Factor TV-ի տեղեկություններով՝ Շավարշ Գրիգորյանի հրաժարականի պատճառն այն է, որ նա պատրաստվում է տեղափոխվել և բնակություն հաստատել Դուբայում։ Նա Հայաստանում ձկնաբուծական բիզնես ունի, ըստ տեղեկությունների՝ արտադրանքն արտահանելու է Դուբայ։ Գրիգորյանը մտերիմ է օրերս աշխատանքի և սոցիալական հարցերի նախարարի պաշտոնում նշանակված, ՔՊ-ական Արսեն Թորոսյանի հետ։ Երբ Թորոսյանը զբաղեցնում էր առողջապահության նախարարի պաշտոնը, Գրրիգորյանն աշխատում էր նախարարությունում։ Շավարշ Գրիգորյանի հետ կապ հաստատել չհաջողվեց։
Բացի այս, հրաժարականի դիմում է ներկայացրել քաղաքապետարանի աշխատակազմի վերահսկողության վարչության պետի պաշտոնակատար Աննա Գևորգյանը, այդ ճանապարհն է բռնել նաև անշարժ գույքի կառավարման վարչության պետ Վահան Խաչատրյանը։ Ի դեպ, Գրիգորյանն ու Գևորգյանը մտերիմներ են։
Երևանի քաղաքապետի մամուլի քարտուղար Հայկ Կոստանյանը Factor TV-ի հետ զրույցում ո՛չ հերքեց, ո՛չ հաստատեց հրաժարականների վերաբերյալ մեր տեղեկությունները։
Ի դեպ, Աննա Գևորգյանը 2005 թվականին ևս աշխատել է քաղաքապետարանում՝ Երվանդ Զախարյանի օրոք։ Իսկ մինչ 2024-ի փետրվարին վերահսկողության վարչության պետի պաշտոնակատար նշանակվելը, զբաղեցրել է քաղաքապետարանի աշխատակազմի քարտուղարության զանգերի սպասարկման և աջակցման բաժնի պետի պաշտոնը։
Արփի Հակոբյան
